Feık: DDSU COVID-19 qarsy vaktsınalardyń janama áserleri týraly málimdedi

NUR-SULTAN. QazAqparat - Áleýmettik jelilerde Dúnıejúzilik densaýlyq saqtaý uıymy óz saıtynda COVID-19 qarsy vaktsınalardyń tirkelgen janama áserleriniń tolyq tizimin jarııalaǵany týraly aqparat tarady.

Onyń ishinde, tirek-qımyl apparaty aýrýlary men psıhıkalyq buzylystar atalǵan. Bul aqparat shyndyqqa janaspaıdy jáne manıpýlıatsııa belgilerine ıe, dep habarlaıdy QazAqparat stopfake.kz saıtyna silteme jasap.

8 mınýttyq vıdeoda Italııa turǵyny paıdalanýshylarǵa VigiAccess derekqoryn kórsetedi. Ol izdeý jolyna COVID -19 qarsy vaktsınanyń ataýyn jazyp, tirkelgen degen janama áserlerdiń tizimin ashady.

VigiAccess derekqoryn DDSU 2015 jyly iske qosty. Qazirgi kezde onda álemniń 110-nan astam elinde qoldanylatyn 100 000-nan artyq túrli preparat tirkelgen. Sondaı-aq, álem boıynsha paıdalanýshylardan kelip túsken jáne suryptalǵan janama áserler týraly habarlamalar jınalǵan. ıAǵnı, bul ózdiginen esep berý júıesi.

VigiAccess derekteri janama áser men belgili bir dári-dármek arasynda eshqandaı rastalǵan baılanys ornatpaıdy. Bul týraly árbir paıdalanýshyǵa saıttyń izdeý jolaǵyna kirmes buryn eskertiledi.

«Vigiaccess-tegi yqtımal janama áserler týraly aqparatty dárilik preparat nemese onyń áser etýshi zaty baqylanatyn áser týǵyzdy nemese paıdalaný úshin qaýipsiz ekendiginiń belgisi dep qabyldamaýlaryńyz kerek. Sebep-saldar baılanysyn rastaý – bul barlyq qoljetimdi derekterdi muqııat ǵylymı jáne egjeı-tegjeıli baǵalaýdy qajet etetin kúrdeli protsess. ıAǵnı, osy saıttaǵy aqparat dárilik zat pen janama áserdiń arasyndaǵy qandaı da bir rastalǵan baılanysty kórsetpeıdi».

Demek, VigiAccess derekqorynyń málimetterin osy kontekste qoldaný vaktsınatsııaǵa qarsy adamdardyń manıpýlıatsııasy bolyp tabylady.