Feık: «2025 jyly jańa pandemııa bolady»
Jelide keıbir derekkózder "2025 jyly jańa ınfektsııa paıda bolatyny boljanyp otyr" degen aqparat taratty. Bul "ashtyq pen kóp adamnyń ólimine ákeledi" eken. Bul — ótirik aqparat, dep jazady stopfake.kz.
Birinshiden, avtor eshqandaı naqty aqparat kózderin atamaıdy. Biraq 2024 jyldyń qazan aıynan 2025 jyldyń qazan aıyna deıin álemde ashtyq pen jappaı ólim bolady dep málimdeıdi. Ol kezde «H aýrýy» taraıdy eken.
«H aýrýy» termınin Dúnıejúzilik densaýlyq saqtaý uıymy 2018 jyly engizdi. Bul múldem ınfektsııa emes. Ǵalymdar bolashaqta epıdemııaǵa ákelýi múmkin belgisiz aýrýdy osylaı ataıdy. Buǵan deıin, 2015 jyly DDU pandemııa týdyrýy yqtımal basym qozdyrǵyshtardyń tizimin jasady. Tizim turaqty emes, ol jańartylyp otyrady.
The Guardian basylymynyń habarlaýynsha, Ulybrıtanııada vaktsınalardy zertteý ortalyǵy ashyldy. Onda janýarlardyń vırýstaryn zerttep, ımmýndaýdy kúsheıtý qajet aımaqtar anyqtalyp, «H aýrýyna» daıyndyq júrgiziledi. Mundaı zerthanany qurý «100 kúndik mıssııa» jobasyna kiredi. Ǵalymdar 100 kúnde H aýrýyn tıimdi jeńe alatyn qaýipsiz vaktsına jasaý ústinde.
Habarlama avtorlary Dúnıejúzilik ekonomıkalyq forýmdy da mysal retinde keltiredi. Bul uıym 2025 jylǵa qaraı bolatyn apatty ınfektsııany modeldegen eken. Bul týraly DEF-tiń resmı saıtynda da, áleýmettik jelilerinde de aqparat joq.
2023 jyldyń sáýirinde 2025 jyly pandemııanyń bastalýyna sebep bolatyn SEERS vırýsy jasaldy degen jalǵan aqparat tarady. AP faktchekerleri bul oqý-jattyǵýlary bolǵanyn anyqtady. Ony 2022 jyldyń qazan aıynda Djons Hopkıns ortalyǵy DDSU jáne Geıts otbasylyq qorymen birlesip uıymdastyrǵan.
«Apatty aýrý juqtyrý» jattyǵýlarynda bolashaq pandemııamen kúres sharalary men oǵan daıyndyq pysyqtaldy.
Sondaı-aq, jarııalanymda Deagel saıtynyń boljamy týraly aıtylady. 2025 jyly planeta halqy azaıady eken. Deagel platformasynda ártúrli elderdiń áýe-ǵarysh kúshteri týraly aqparat bar. Munda osy taqyryptaǵy jańalyqtar shyǵady, saıt eshqandaı boljam jasamaıdy.
Osylaısha, 2025 jyly álemde josparlanǵan ınfektsııa tarap, ashtyq pen jappaı ólim bolatynyna dálel joq.
