Feıerverk atpaıdy: Nıderland parlamenti petardadan bas tartý týraly túbegeıli sheshim qabyldady
ASTANA. KAZINFORM — Nıderland parlamentiniń joǵarǵy palatasy 2026 jyldan bastap jeke tulǵalarǵa petardalar qoldanýǵa tolyq tyıym salý týraly sheshimdi maquldady, dep jazdy DW.
Der Spiegel basylymynyń jazýynsha, bul sheshimniń basty sebebi — jańa jyl qarsańynda kúsheıgen zorlyq-zombylyq. Sol kúnderi polıtsııa, órt sóndirýshiler men qutqarýshylarǵa qater tóndirip, kúsh kórsetetin jaǵdaılar jıi kezdesedi.
Feıerverkterge tyıym salý máselesi Nıderlandyda kóp jyldan beri qyzý talqylanyp kelgen. Dárigerler, polıtsııa, jergilikti bılik, janýarlardy jáne qorshaǵan ortany qorǵaý uıymdary bul shekteýdi qoldap kelgenimen, parlamentte oǵan qoldaý jetispeı turǵan edi.
Kórshiles Germanııada feıerverk atý áli de ruqsat etilgen, biraq bul elde de qoǵam tarapynan qysym kúsheıip keledi. 2025 jylǵy 5 qańtarǵa deıin Germanııada petardalardy ulttyq deńgeıde tyıym salýdy talap etken petıtsııany 1 mıllıon 90 myńnan astam adam qoldady. Petıtsııada tótenshe qyzmet ókilderi Jańa jyl túninde «ómiri men densaýlyǵyna qaýip tóndirip jumys isteıdi, óıtkeni petardalar olarǵa qarsy qarý retinde qoldanylatyny aıtylǵany» atalyp otyr.
Eske sala keteıik, buǵan deıin Danııada jańa jyldyq otshashý men petardanyń saldarynan 82 adam jaraqattanǵanyn jazǵan bolatynbyz.