Ferstappen «Formýla-1» Ázerbaıjan Gran-prıindegi jarysta ekinshi ret jeńiske jetti

BAKÝ. KAZINFORM — Bakýde «Formýla-1» álem chempıonaty kezeńiniń basty jarysy — Ázerbaıjan Gran-prıi aıaqtaldy, dep habarlaıdy Kazinform agenttiginiń menshikti tilshisi.

Jeńimpaz atanǵan Red Bull komandasynyń pıloty Maks Ferstappen búkil qashyqtyq boıy senimdi júrgizý sheberligi men turaqty jyldamdyǵyn kórsetti.

Bul tartysty jarysqa árqaısysy eki pılottan turatyn 10 komanda qatysty.

Eki saǵat ishinde jarysýshylarǵa kúrdeli qalalyq trassada 51 aınalymdy eńserý tapsyryldy.

Ferstappen úzdik nátıje kórsetip, poýl-pozıtsııadan jarysty bastap, alǵashqy aınalymdardan-aq kóshbasshylyqty ýysynan shyǵarmady.

Ekinshi oryndy Mercedes komandasynyń qatysýshysy Djordj Rassel ıelense, úshinshi bolyp Williams atynan qatysqan Karlos Saıns márege jetti.

Jarys kezinde oqys oqıǵalar da boldy. McLaren komandasynyń pıloty Oskar Pıastrıdiń bolıdi bir burylysta qorshaýǵa soqtyǵysyp, bul jaǵdaı qaýipsizdik kóliginiń trassaǵa ýaqytsha shyǵýyna sebep boldy. Abyroı bolǵanda, jarysýshynyń ózi zardap shekken joq.

Búgin sondaı-aq «Formýla-2» jarysy da óz máresine jetti. Onda DAMS komandasynyń jarysýshysy Djek Kroýford jeńiske jetip, joǵary sheberlik pen tehnıkalyq daıyndyǵyn kórsetti.

Aıta keteıik, Ázerbaıjan 2016 jyldan beri «Formýla-1»-diń eń qyzyqty kezeńderiniń biri — Ázerbaıjan Gran-prıin turaqty túrde ótkizip keledi. Bakýdegi alǵashqy jarys Eýropa Gran-prıi ataýymen ótip, onyń jeńimpazy Nıko Rosberg bolǵan edi.

Keıingi jyldary Baký trassasynda Danıel Rıkkardo, Lıýıs Hemılton, Valtterı Bottas, Serhıo Peres, Maks Ferstappen jáne Oskar Pıastrı syndy tanymal jarysýshylar jeńiske jetti.

Buǵan deıin «Formýla-1» irikteý jarystary barysynda birneshe apat bolyp, sonyń saldarynan sessııa ýaqytsha toqtatylǵany habarlanǵan bolatyn.