Ferroqorytpa zaýytynda kúıip qalyp aýrýhanaǵa túsken eki adamnyń jaǵdaıy jaqsardy
QARAǴANDY. KAZINFORM - Densaýlyq saqtaý basqarmasy ferroqorytpa zaýytynda tótenshe jaǵdaı kezinde zardap shekken eki adam reanımatsııadan jalpy palataǵa aýystyrylǵanyn habarlady. Taǵy eki naýqas áli de óte aýyr jaǵdaıda.
«Professor H.J. Maqajanov atyndaǵy kópsalaly aýrýhananyń kombýstıologııa bóliminde jatqan Qaraǵandydaǵy ferroqorytpa zaýytynda zardap shekken eki naýqasqa jalpy jaǵdaıynyń jaqsarýyna baılanysty emdeý-qorǵaý rejımi jeńildetildi. Endi patsıentter palatada júre alady, jaqyn týystarynyń qysqa merzimdi kelýine ruqsat etiledi», — dep habarlady oblystyń densaýlyq saqtaý basqarmasynyń baspasóz qyzmeti.
Dárigerlerdiń aıtýynsha, taǵy eki patsıent áli de jan saqtaý bóliminde óte aýyr jaǵdaıda. Dárigerler olardyń ómiri úshin kúresip jatyr.
«Búgingi tańda kúıik jaraqatymen túsken zardap shekkenderdiń ekeýiniń jaǵdaıy jaqsaryp, jalpy palatalarǵa aýystyrylyp, shok kúıinen shyǵaryldy. Naýqastarǵa kúıikke qarsy sharalarǵa baǵyttalǵan qosymsha terapııa júrgizilip jatyr. Al eki naýqas óte aýyr jaǵdaıda reanımatsııada. Qarqyndy terapııa júrgizilip jatyr», — deıdi H.J. Maqajanov atyndaǵy kópsalaly aýrýhananyń travmatologııa ortalyǵynyń jetekshisi, professor Berik Tóleýbaev.
Keshe túnde balqytý tsehynyń mehanıgi Adamchýk Dmıtro men bas mehanık qyzmetiniń sheberi Jetpisbaev Tólegen kúıikten qaıtys boldy.
24 shilde kúni tańerteń zaýytta tehnolog bolyp jumys istegen 25 jastaǵy Erulan Qazken qaza boldy.
22 shildede Mýzafar Ismaılov alǵan kúıikterinen qaıtys boldy. Ol Qaraǵandy oblysynyń Buqar Jyraý aýdanyndaǵy Úmitker aýylynda jerlengen.
Eske salsaq, Qaraǵandydaǵy ferroqorytpa zaýytynyń peshinen kenetten jalyn shyǵyp, kásiporynnyń 8 qyzmetkeri zardap shekti.
