Ferroqorytpa zaýytyndaǵy apat: taǵy eki adam aýrýhanada qaıtys boldy
QARAǴANDY. KAZINFORM — Qaraǵandy aýrýhanasynda ferroqorytpa zaýytynda zardap shekken taǵy eki adam qaza tapty. Tórt naýqas áli de aýyr jaǵdaıda, dep habarlaıdy Kazinform agenttiginiń tilshisi.
«Qarqyndy reanımatsııalyq is-sharalar ótkizilgennen keıin Qaraǵandy ferroqorytpa zaýytynyń taǵy eki qyzmetkeriniń ómirin saqtap qalý múmkin bolmady. 1981 jáne 1987 jyly týylǵan naýqastar esin jımastan qaıtys boldy. Dárigerler olardyń ómirin saqtap qalý úshin bar kúsh-jigerip salyp, kúresken bolatyn. Qaza tapqandardyń jaqyn týystaryna shyn júrekten kóńil aıtamyz», - dep habarlady Densaýlyq saqtaý basqarmasynyń baspasóz qyzmeti.
Qaza bolǵandar – balqytý tsehynyń mehanıgi Adamchýk Dmıtro men bas mehanık qyzmetiniń sheberi Tólegen Jetpisbaev.
Birneshe saǵat buryn zaýytta tehnolog bolyp jumys istegen 25 jastaǵy Erulan Qazken qaıtys bolǵan edi. Al eki kún buryn alǵan kúıik saldarynan Mýzafar Ismaılov kóz jumǵan. Ol Qaraǵandy oblysynyń Buqar Jyraý aýdanyndaǵy Úmitker aýylynda jerlendi.
YDD kompanııasy jerleýdi uıymdastyrý, qonaq asyn ótkizý jáne mazar turǵyzý, eskertkish ornatý boıynsha barlyq shyǵyny óz moınyna alǵanyn, sondaı-aq qaza tapqan qyzmetkerlerdiń otbasylaryna barlyq qajetti qoldaý kórsetetinin eske saldy.
Atap aıtqanda, kompanııa kelesi mindettemelerdi óz moınyna alady:
- Otbasyn qoldaý úshin jyldyq 10 jalaqy mólsherinde birjolǵy tólem.
- Otbasynyń turǵyn úı jaǵdaıyn jaqsartýǵa kómektesý.
- Qyzmetker men onyń jubaıynyń barlyq nesıesin tolyq óteý.
Esterińizge sala keteıik, 20 shildede Qaraǵandyda ferroqorytpa zaýytynyń peshinde kenetten jalyn shyqty. TJ saldarynan kásiporynnyń segiz qyzmetkeri zardap shekti. Olar Professor H.J.Maqajanov atyndaǵy kópsalaly aýrýhanaǵa jetkizildi.
QR Densaýlyq saqtaý mınıstrliginiń tapsyrmasy boıynsha qosymsha medıtsınalyq kómek kórsetý úshin Qaraǵandyǵa akademık N.D.Batpenov atyndaǵy Ulttyq Travmatologııa jáne ortopedııa ǵylymı ortalyǵynyń qyzmetkerleri keldi.
