Ferrarı, Rolls-Roıs, záýlim úı: Eńbek mınıstri «A» sanatynyń belgilerin atady
ASTANA. KAZINFORM – Qazaqstanda ál-aýqaty joǵary otbasylardy anyqtaý úshin birneshe ólshem qatar qoldanylady. Atap aıtqanda, jan basyna shaqqandaǵy tabys, jyljymaıtyn múlik, bıznes aktıvteri men qymbat avtokólikter eskeriledi.
Eńbek jáne halyqty áleýmettik qorǵaý mınıstri Asqarbek Ertaev A sanatyna jatatyn otbasylardyń qandaı belgiler boıynsha anyqtalatynyn túsindirdi.
Mınıstrdiń aıtýynsha, A sanatyna ál-aýqaty joǵary otbasylar jatady. Olardy anyqtaý úshin tómendegi belgilerdiń keminde ekeýi qatar bolýy qajet.
• bir adamǵa shaqqandaǵy aılyq tabys 356 myń teńgeden bastalýy;
• jalpy aýdany 120 sharshy metrden asatyn birneshe turǵyn úıdiń bolýy;
• kommertsııalyq jyljymaıtyn múliktiń bolýy;
• iri bıznestiń bolýy;
• lıýks sanatyndaǵy avtokólikke ıelik etý;
• iri jer ýchaskeleri men aýyl sharýashylyǵy aktıvteriniń bolýy.
Bul rette avtomobılderdiń shyǵý jylyn eskere otyryp, 11 marka – Ferrari, Rolls-Royce, Lamborghini, Bentley, Porsche, Maybach, Maserati, Aston Martin, McLaren, Lotus, Rivian bolǵanda ál-aýqaty joǵary otbasyǵa jatady.
Bir ǵana kórsetkish otbasyn A sanatyna jatqyzýǵa negiz bolmaıdy.
– A sanatyna eń aýqatty úı sharýashylyqtary jatady. Olardyń qatarynda Forbes tizimine engen adamdar, iri bıznes ıeleri, eleýli múlki men aýyl sharýashylyǵy aktıvteri bar adamdar kiredi. Qazirgi ýaqytta ál-aýqaty joǵary, A sanatyna jatatyn 329 myń úı sharýashylyǵy bar. Bul – barlyq úı sharýashylyǵynyń shamamen 5 paıyzy, – dedi A. Ertaev.
Eńbek mınıstri alty adamnan turatyn kópbalaly otbasyn mysalǵa keltirdi. Bul otbasynda jan basyna shaqqandaǵy aılyq tabys – 458 myń teńge. Menshiginde jalpy aýdany 780 sharshy metr bolatyn úı men páter, 2023 jylǵy Bentley avtokóligi jáne 150 sharshy metr kommertsııalyq ǵımarat bar.
– Bul joǵary ál-aýqattyń tórt belgisi. Soǵan qaramastan, otbasy kópbalaly otbasylarǵa arnalǵan járdemaqy alady. Osyndaı kezde ádilettilik máselesi týyndaıdy: aýqatty otbasy men qarajaty jetkiliksiz otbasy bıýdjetten birdeı kómek alǵany durys pa? 2027 jyldan bastap mundaı otbasyǵa muqtajdyq prıntsıpteri boıynsha tólemder taǵaıyndalmaıdy, – dedi Asqarbek Ertaev.
Buǵan deıin A. Ertaev birde-bir muqtaj qazaqstandyq qoldaýsyz qalmaıtynyn aıtqan edi.
Al járdemaqy úshin ajyrasýdyń aldyn alý úshin bólek turatyn ata-analar da balanyń otbasy quramyna engiziledi.
