Ferrari óziniń alǵashqy elektromobılin tanystyrdy: Ferrari Luce
ASTANA. KAZINFORM — Ferrari kompanııasy óziniń alǵashqy tolyq elektrli kóligin resmı túrde tanystyrdy. Ferrari Luce dep atalǵan tórt esikti sýperkardyń tusaýkeseri ótti, dep habarlaıdy Kazinform agenttigi Reuters-ke silteme jasap.
Ańyzǵa aınalǵan sportkar óndirýshisi úshin bul sońǵy jyldardaǵy eń táýekeli joǵary ári eń kóp kútilgen jobalardyń biri sanalady.
Jańa elektrli Ferrari saǵatyna 310 shaqyrymǵa deıin jyldamdyqpen júre alady. Kóliktiń baǵasy 500 myń eýrodan asady.
Luce ataýy ıtalııa tilinen aýdarǵanda «jaryq» degen maǵynany bildiredi.
Jańa model formaty men dızaıny jaǵynan Ferrari-diń dástúrli kólikterinen aıtarlyqtaı erekshelenedi.
Ferrari Luce modelin ázirleýge LoveFrom stýdııasy qatysqan. Bul stýdııany Djonı Aıv qurǵan. Ol buǵan deıin Apple kompanııasynyń bas dızaıneri bolǵan.
Derekkózderdiń málimetinshe, elektrokarǵa kólemi iri kýzov pen brendtiń klassıkalyq úlgilerine uqsamaıtyn erekshe dızaın berilgen.
Sarapshylar Ferrari-diń alǵashqy elektromobıliniń naryqqa shyǵýyn luxury-sýperkar ındýstrııasy úshin mańyzdy kezeń dep baǵalap otyr.
Ferrari kompanııasy elektrli kólik jobasymen birneshe jyl boıy aınalysqan.
Daıyndyq jumystary on jyldan astam ýaqyt buryn Formula One jarys bolıdterine gıbrıd tehnologııalaryn engizýden bastalǵan.
Kompanııa alǵashqy serııalyq gıbrıd modelderin 2019 jyldan bastap shyǵara bastady.
Ferrari Luce kóliginiń alǵashqy jetkizilimi klıentterge qazan aıynda bastalady.
Buǵan deıin álemdegi elektromobıl satylymy 2026 jyly qaıta ósip, 23 mıllıon danaǵa jetetini habarlanǵan edi. Sarapshylardyń boljamynsha, bul álemde satylatyn barlyq avtokóliktiń shamamen 30 paıyzyn quraıdy.
Osyǵan deıin Ferrari-diń Taıaý Shyǵysqa kólik jetkizýdi toqtatqany týraly jazdyq.
