Ferrari men Pirelli basshylary karantın kezinde volonter bolyp júr
RIM. QazAqparat – Italııada ataǵy keńge taraǵan jarys kólikterin shyǵaratyn Ferrari jáne Pirelli kompanııalarynyń ıeleri koronavırýske baılanysty jedel járdem brıgadalaryna volonter bolyp bardy, dep habarlaıdy QazAqparat.
Formula1.com resmı saıtynda Pirelli Motorsport basshysy Marıo Izolanyń koronavırýsqa shaldyqqan adamdarǵa shuǵyl shyǵatyn brıgadalardyń quramynda paramedık bolyp jumysqa ornalasqany jazylady.
«50 jastaǵy Izolanyń aıaq astynan dárigerlik qabilet paıda boldy dep oılap qalmańyzdar. Ol jas kezinde paramedıktiń oqýyn oqyǵan. Aýrý juqtyrý qaýpine qaramastan, Pirelli basshysy úıde karantınde otyrmaı, paramedıkter komandasyna turaqty túrde kómegin berip turady», - delingen aqparatta.
Izola bir mınýt ta oılanbastan jedel járdemde jumys isteýge keliskeni aıtylady. Onyń birinshi aýysymy 5 sáýirde ótken. Árbir aýysym 10-12 saǵatqa sozylady.
Pirelli Motorsport basshysy bul ońaı jumys emes ekenin moıyndaıdy. «Óte aýyr. Bul vırýs qaýipti, biz tilsiz jaýmen kúresip kelemiz. Árbir shyǵar kezde patsıentterimizdi qosymsha qaýipten saqtaý úshin jedel járdem kóligin óńdep, jýyp-shaıýǵa 30 mınýt ýaqyt ketiremiz», - deıdi ol.
Al Ferrari komandasynyń burynǵy basshysy Maýrıtsıo Arrıvabene týǵan eli Italııaǵa vırýspen kúresýge kómektesip jatqanyn eshkimge jarııa etpegen. M. Arrıvabene salony sándi Ferrari-di jedel járdem kóligine aýystyrdy.
«Arrıvabene vırýs órshigen kezde jedel járdem kóligine otyrǵanyn eshkimge aıtqan joq. Bir sózben aıtqanda, ol onyń júrgizýshisi boldy!», - dep málim etken Italııa jýrnalısi Leo Týrrınıge «Formýla 1» kompanııasyndaǵy derekkóz.
Ferrari-di 2014-2019 jyldary basqarǵan Arrıvabene óziniń aýyr minezimen tanylǵan eken.
«Burqyldaq bolsa da, júregi keń Arrıvabene eshkimge eshteńe aıtpaýdy uıǵardy. Alaıda vırýs órshigen kezden bastap ol jedel járdem kóligin júrgizip, egde jastaǵy adamdardy aýrýhanaǵa jetkizip júr», - dep jazǵan Il Resto del Carlino gazeti.
Búginde Italııada koronavırýs ınfektsııasyn juqtyrýdyń 210 700-den astam oqıǵasy tirkeldi. Іndetten 29 myńǵa jýyq adam qaıtys boldy.
