Fermerlerge tómen paıyzben nesıe beriledi – Serik Jumanǵarın Aqtóbe oblysynda

AQTÓBE. QazAqparat – Fermerlerge tómen paıyzben nesıe beriledi. Bul týraly Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın Aqtóbe oblysy Mártók aýdany Sarjansaı aýylynyń turǵyndarymen kezdesýinde aıtty, dep habarlaıdy QazAqparat Úkimettiń resmı saıtyna silteme jasap.

Aýylda óz sharýashylyǵyn qurý úshin «Aýyl amanaty» memlekettik baǵdarlamasy boıynsha jeńildetilgen nesıe alǵan kásipker az emes. Aqtóbe oblysynyń ákimi Eraly Toǵjanov vıtse-premerdi mamandandyrylǵan jármeńkede baǵdarlama boıynsha qoldaý alǵan jeke qosalqy sharýashylyqtardyń ónimderimen tanystyrdy.

Turǵyndarmen kezdesýde Serik Jumanǵarın áleýmettik mańyzy bar azyq-túlik taýarlarynyń baǵasyn turaqtandyrý jáne elimizde azyq-túlik taýarlaryn óndirýdi damytý boıynsha qabyldanyp jatqan sharalar týraly aıtty.

Onyń sózinshe, qant, sút, qus eti, kúnbaǵys maıy sııaqty birqatar áleýmettik azyq-túlik ónimderiniń ımportqa táýeldiligi jáne kókónis qoımalarynyń jetkilikti sanynyń bolmaýy – baǵanyń ósýiniń basty sebepteri.

«Úkimet qazir úlken jobany júzege asyryp jatyr, bul – SQO tájirıbesi boıynsha sút-taýar fermalaryn, qus fabrıkalaryn, kókónis qoımalaryn, sýarý jobalaryn salý úshin fermerlerge tómen paıyz jeńildikpen kredıt berý. Joba aıasynda bıyl 65 sút-taýar fermasyn salýǵa 100 mlrd teńge bólindi, keler jyly taǵy 50 ferma salý josparlanǵan», - dedi S. Jumanǵarın.

Sondaı-aq, 2024 jyly sýarý, kókónis qoımalaryn, qus fabrıkalaryn salý boıynsha jobalar josparlanǵan. Osy sharalardyń barlyǵy eldiń negizgi azyq-túlik ónimderge qajettiliginiń ımportqa táýeldiligin barynsha tómendetýge múmkindik beredi.

Sarjansaı aýylynyń turǵyndarymen kezdesýde Serik Jumanǵarın sýarmaly sý problemalaryn sheshý boıynsha qabyldanyp jatqan sharalar týraly baıandady. Vıtse-premerdiń sózinshe, Qazaqstannyń sý resýrstary máselesin zertteý jáne sheshý jónindegi jumys toby qurylǵan. Birlesken jumysqa Qytaı men Izraılden sarapshylar shaqyrylady.

«Aldyn ala baǵalaýlar boıynsha bizde sý jetkilikti, biraq ony qalaı saqtaý kerektigin bilmeımiz. Sýdy únemdeý tehnologııalaryn ázirleý jáne qoldaný boıynsha jumys jasaımyz», - dep atap ótti mınıstr.

Kezdesýge qatysýshylar aýylsharýashylyǵy tehnıkasyn satyp alýdy sýbsıdııalaý, kókónis qoımalaryn salýǵa memlekettik qoldaý kórsetý, mal ósirýge qolbaılaý sý tapshylyǵy jáne taǵy basqa máseleler boıynsha suraqtaryn qoıdy. Ásirese, maqsatsyz paıdalanylyp jatqan jerlerdi qaıtarý máselesine erekshe nazar aýdaryldy.

«Memleket jerdi qaıtarý boıynsha aýqymdy jumystar júrgizip keledi. Byltyr 5,4 mln ga qaıtaryldy. Bıylǵa 5 mln ga josparlandy, búginde onyń 1,6 mln ga qaıtaryldy», - vıtse-premer.

Vıtse-premerdiń jeke qabyldaýynda azamattar oblysty joǵary tehnologııalyq medıtsınalyq tehnıkamen qamtý jáne aımaqty abattandyrý boıynsha máselelerdi sheshýde septestik etýin surady. Serik Jumanǵarın barlyq máseleni muqııat tyńdap, olardy quzyretti memlekettik organdardyń zerdeleýin tapsyrdy. Turǵyndarmen kezdesý qorytyndysy boıynsha vıtse-premer jergilikti BAQ úshin brıfıng ótkizdi.

Sondaı-aq, Serik Jumanǵarın Aqtóbe oblysyna jumys sapary aıasynda óńirdegi kásiporyndarǵa da bardy.