Fermerlerge sýbsıdııa bólý júıesi jetildiriledi – Álıhan Smaıylov

ASTANA. QazAqparat – Agroónerkásip keshenin damytý aıasynda 300-ge jýyq joba júzege asyrylyp jatyr. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Úkimet basshysy Álıhan Smaıylov aıtty, dep habarlaıdy QazAqparat tilshisi.

«Agroónerkásip keshenin damytý boıynsha jalpy quny 536 mlrd teńgeni quraıtyn 300-ge jýyq joba júzege asyrylyp jatyr, bul shamamen 7 myń jumys ornyn ashýǵa múmkindik beredi. Sonymen qatar, sýbsıdııalaý júıesi jetildirilip jatyr», - dedi Á. Smaıylov.

Sondaı-aq Premer-Mınıstr bıylǵy kóktemgi egis jáne egin jınaý jumystaryna jeńildetilgen kredıt somasynyń 140 mlrd teńgege deıin óskenin aıtty. Sharýalarǵa 419 myń tonna dızel otyny arzandatylǵan baǵamen bólindi.

«Budan bólek, egin oraǵyna qosymsha 400 myń tonna arzandatylǵan dızel otyny qarastyryldy. Aýyl sharýashylyǵy tehnıkasyna jeńildikpen kredıt berý 145 mlrd teńgege deıin artty», - dedi ol.

Onyń aıtýynsha, Memleket basshysynyń tapsyrmasyna sáıkes, aýyldaǵy áleýmettik, ınjenerlik jáne kólik ınfraqurylymyn jańǵyrtýǵa baǵyttalǵan Aýyldardy damytý jóninde jańa tujyrymdama qabyldandy.

Úkimet basshysynyń sózine qaraǵanda, bıyl mıkrokredıt berý jáne aýyl sharýashylyǵy kooperatsııasyn damytý arqyly aýyl halqynyń tabysyn arttyrý boıynsha «Aýyl amanaty» jobasyn iske asyrý jumystary bastaldy. Bul maqsatqa bıyl 100 mlrd teńge bólindi. 7 jyl ishinde joba boıynsha 1 mln-nan astam aýyl turǵyny qamtylady. Oǵan jalpy 1 trln teńge kózdelgen.

Osy rette Álıhan Smaıylov aýyldy damytýdyń negizgi tetikteriniń biri «Aýyl – El besigi» baǵdarlamasy bolyp qala beretinin basa aıtty. Bıyl baǵdarlama aıasynda 900 aýylda jalpy quny 198 mlrd teńge bolatyn 1800-den astam jobany iske asyrý kózdelip otyr. Sondaı-aq shekara mańy aýdandarynyń ınfraqurylymyn damytý boıynsha sharalar qolǵa alyndy. 2023 jyly 140 aýylda 290 nysan paıdalanýǵa beriledi.

Budan buryn habarlanǵandaı, Prezıdent sýbsıdııa berý júıesi óte kúrdeli ekenin aıtty.