Fermerlerge bergen sýbsıdııanyń qaıtarymy mardymsyz — Erlan Qoshanov

ASTANA. KAZINFORM — Májilis spıkeri Erlan Qoshanov aýyl sharýashylyǵyna bólinip jatqan sýbsıdııalardyń ekonomıkalyq qaıtarymy mardymsyz ekenin synady.

Májilis depýtattary Joǵary aýdıtorlyq palatanyń agroónerkásip keshenin damytýǵa bólinip jatqan sýbsıdııalardyń tıimdiligi týraly aýdıt qorytyndysy týraly qaýlyny qabyldady. Daýys berý rásiminen keıin sóz alǵan Erlan Qoshanov sýbsıdııa máselesi daýys berýshiler tarapynan depýtattardyń aldyna jıi qoıylatynyn aıtty.

— Búginde agroónerkásip keshenin qarjylandyrý kólemi jyl saıyn artyp kele jatyr. Tek keıingi 5 jyldyń ózinde salany sýbsıdııalaýǵa 2 trln teńgeden astam qarajat bólindi. Bul, árıne, jaqsy kómek. Biraq osy qarjyny ıgerý, memlekettik qoldaý kórsetý kezinde problemalyq máseleler týyndap jatady. Depýtattardyń aımaqtarǵa sapary barysynda osy máseleler jıi kóteriledi. Áriptester, áli kúnge deıin aýyl sharýashylyǵyndaǵy negizgi qarajat kózi — memlekettik sýbsıdııa ekenin moıyndaýymyz kerek. Sol arqyly salada oń ózgerister oryn alyp jatyr. Biraq tsıfrlarǵa súıener bolsaq, sýbsıdııalardyń nátıjesi, ekonomıkaǵa qaıtarymy ázirge jetkiliksiz, — dedi ol.

Spıkerdiń sózinshe, salanyń ishki jalpy ónimdegi úlesi 14 jyl ishinde 4-5%-dan aspaı otyr.

— Salynǵan árbir sýbsıdııanyń, árbir teńgeniń ekonomıkaǵa áseri aıtarlyqtaı baıqalmaıdy. Mysaly, mal sharýashylyǵy men eginshilik kórsetkishterine, azyq-túliktiń qoljetimdiligi men baǵasyna áser etip jatqany áli de sezilmeıdi. Bul — uzaq jyldan beri qordalanǵan máseleler. Sýbsıdııalar fermerlerdiń shyǵynyn óteýge ǵana emes, tutastaı aýyl sharýashylyǵyn damytýǵa baǵyttalýy kerek. Aýyl sharýashylyǵyna úlken serpin ákelý úshin birinshi kezekte, ǵylymdy damytýymyz kerek, — dedi palata tóraǵasy.

Aıta keteıik, osyǵan deıin Erlan Qoshanov Qazaqstan UQShU-nyń halyqaralyq uıymdarmen baılanysyn nyǵaıtýǵa erekshe kóńil bólgenin atap ótti.