Fermerlerge avans: qyzyl jasymyq egisi úshin qarjylyq qoldaý usynylady
ASTANA. KAZINFORM — 2025 jyldan bastap Azyq-túlik kelisimshart korporatsııasy qyzyl jasymyq óndirisin uzaq merzimdi forvardtyq qarjylandyrýǵa ótinimder qabyldaıdy, dep habarlaıdy AShM baspasóz qyzmeti.
Pılottyq joba BUUDB-men birlesip «Aýyl sharýashylyǵy óndirisiniń ornyqty júıesin ilgeriletý jáne Soltústik Qazaqstan landshaftynyń ekojúıelerin saqtaý» baǵdarlamasy sheńberinde iske asyrylyp jatyr.
Joba Soltústik Qazaqstan, Aqmola jáne Qostanaı oblystarynyń aýyl sharýashylyǵy óndirýshilerine baǵyttalǵan. Qazirgi ýaqytta agroqurylymdardan ótinimderdi irikteý júrgizilip jatyr. Іrikteý kezinde sharýashylyqtardyń aýyspaly egisti saqtaýǵa daıyndyǵy, qajetti aýyl sharýashylyǵy tehnıkasynyń jáne shtattyq agronomnyń bolýy eskeriledi, sebebi baǵdarlamaǵa qatysý ekologııalyq agrotehnologııalardy mindetti túrde engizýdi jáne ǵalymdardyń usynymdaryn saqtaýdy kózdeıdi.
— Qarjylyq qoldaý qyzyl jasymyqtyń tonnasyna 90 myń teńge esebinen egis jumystaryna avans berýdi kózdeıdi. Tetik suranysqa ıe daqyldardyń egisterin keńeıtýge ǵana emes, sonymen qatar agrobıznestiń turaqtylyǵyn arttyrýǵa baǵyttalǵan, — delingen habarlamada.
BUUDB sarapshylarynyń baǵalaýy boıynsha, elimizdiń soltústik óńirlerinde monodaqylǵa (bıdaıǵa) joǵary táýeldilik saqtalýda, onyń úlesi egis alqaptarynyń 75-87%-na jetedi. Bul rette, ásirese Soltústik Qazaqstan oblysynda dándi-burshaqty daqyldardy ósirý áleýeti eleýli bolyp qala beredi.
«Azyq-túlik kelisimshart korporatsııasy» UK» AQ Basqarma tóraǵasynyń orynbasary Samat Teńbaev atap ótkendeı, sala dándi-burshaqty jáne maıly daqyldardy qosa alǵanda, anaǵurlym marjınaldy daqyldardy ósirýge joǵary qyzyǵýshylyq tanytyp otyr, bul aıtarlyqtaı nátıje beredi.
Sońǵy bes jylda dándi-burshaqty daqyldardyń egis alqaptary tórt eseden astam ulǵaıyp, 781 myń gektarǵa jetti.
2025 jyly qazaqstandyq agrarshylar dándi-burshaqty daqyldardyń rekordtyq ónimin jınady — 1 mln tonnaǵa jýyq, bul rette jasymyq jalpy ónim kóleminen shamamen 78% quraıdy. Jalpy burshaq daqyldaryn jınaýdyń ósýi eksport múmkindikterin keńeıtti. Ulttyq statıstıka bıýrosynyń málimeti boıynsha, keptirilgen burshaq daqyldaryn shetelge jetkizý 570 myń tonnadan asty, bul ótken jylmen salystyrǵanda bir jarym esege jýyq ósti.
Bıdaımen salystyrǵanda joǵary syrtqy suranys pen tartymdy qundylyq jasymyqty fermerler úshin eń perspektıvaly etedi.
— Búginde agroónerkásip kesheniniń aldynda óndiris kólemin ulǵaıtyp qana qoımaı, aýyl sharýashylyǵynyń turaqtylyǵyn qamtamasyz etý mindeti tur. Daqyldardy ártaraptandyrýdy qoldaý jáne zamanaýı agrotehnologııalardy engizý fermerlerge tıimdilikti arttyrýǵa múmkindik beredi. Jalpy, mundaı tásilmen sala naryqtyq jáne basqa da táýekelderge az táýeldi bolady, — dep atap ótti Azyq-túlik kelisimshart korporatsııasynyń ókili.
Uzaq merzimdi forvardtyq qarjylandyrý arqyly fermerler kepildendirilgen ótkizý naryǵyn jáne aınalym qarajattaryna qol jetkizýdi alady. Sonymen qatar BUUDB jobasy sheńberinde qazaqstandyq jáne halyqaralyq sarapshylardyń qoldaýymen qajetti agrotehnıkalyq talaptardy saqtaı otyryp, topyraq qunarlylyǵyn qalpyna keltirý boıynsha jumys isteıtin bolady.
— Bul tetik qarjy quraldarynyń neǵurlym ornyqty jáne ártaraptandyrylǵan agrojúıelerge kóshýdi yntalandyrýdyń praktıkalyq mysaly sanalady, sonymen birge fermerlerdiń kiristiligin arttyryp, sektor úshin táýekelderdi azaıtady, — dep qosty BUUDB Qazaqstandaǵy Turaqty ókiliniń mindetin atqarýshy Sýhrob Hodjımatov.
Budan buryn Aqtóbede ıgerilýi tıis 865 myń gektar jerdiń 506 myń gektaryna dándi daqyl egiletini málim boldy.
