Fermerlerge 70 mlrd teńge kóleminde kómek kórsetildi - AShM
«Agrarlyq nesıe korporatsııasy «Keń dala» baǵdarlamasy boıynsha kóktemgi dala jumystaryn qarjylandyrýdy 35 kún ishinde aıaqtady. 2 405 fermer jyldyq 5% eseppen 70 mlrd teńge aldy. Memlekettik qoldaýǵa ıe bolǵandardyń 95 paıyzy shaǵyn jáne orta bıznes ókili. Egis maýsymyna deıin fermerlerdiń aınalym qarajatyn toltyrý úshin Memleket basshysynyń tapsyrmasymen ótken jyldarmen salystyrǵanda respýblıkalyq bıýdjetten 10 mlrd teńge artyq qarajat bólindi. Sondaı-aq qarjylandyrýdyń jeńildetilgen stavkasy 5 paıyzǵa deıin tómendetildi», - dep atap ótilgen QR AShM baspasóz qyzmetiniń málimetinde.
Tótenshe jaǵdaıdyń engizilýine baılanysty shekteýlerge qaramastan, Agrarlyq nesıe korporatsııasy fermerlerdi qarjylandyrýdy qysqa merzimde, ıaǵnı egis maýsymyna deıin aıaqtady. Memlekettiń kómegin 2 405 fermer aldy, olardyń kópshiligi Túrkistan oblysyndaǵy shaǵyn sharýashylyqtar.
«Keń dala» baǵdarlamasyna qatysýǵa ótinish bergen fermerlerdiń 126-sy 100 mln teńgeden astam qarjyǵa ıe boldy. 194 fermerge ortasha eseppen 57 mln teńgeden berildi.
Memlekettik kómek alǵandardyń 90 paıyzǵa jýyǵy shaǵyn sharýa qojalyqtary. 2085 fermer ortasha eseppen 6,1 mln teńgeden aldy. Bul rette eń az nesıe 600 myń teńgeni qurady.
Prezıdent Qasym-Jomart Toqaevtyń tapsyrmasymen kóktemgi dala jumystaryn júrgizý úshin «Qarapaıym zattar ekonomıkasy» baǵdarlamasynda qosymsha kómek qarastyrylǵanyn atap ótken jón. Oǵan ótinishter qabyldaý bastalyp ketti.
Qosymsha 100 mıllıard teńge de Agrarlyq nesıe korporatsııasy arqyly beriledi. Qaryz alýshylar úshin paıyzdyq syıaqy mólsherlemesi jyldyq 6 paıyzdy quraıdy, sondaı-aq barlyq daqyldardy egý úshin qarjylandyrý qoljetimdi bolady.