Fermerlerdiń jol talǵamaıtyn kóligin salyqtan bosatý - durys emes – Erjan Birjanov

ASTANA. KAZINFORM — Qarjy vıtse-mınıstri Erjan Birjanov fermerlerdiń jol talǵamaıtyn bir kóligin salyqtan bosatý bastamasyn qoldamaıtynyn aıtty. 

Budan buryn habarlanǵandaı, Májilis depýtaty Erbolat Satybaldın aýyldaǵy fermerlerdiń jol talǵamaıtyn bir kóligin salyqtan bosatýdy usyndy. 

Óz kezeginde Erjan Birjanov bul usynyspen kelispeıtinin málim etti.

— Meniń oıymsha, osyndaı jeńildik berý durys emes. Sebebi fermerdiń bir kóligin salyqtan bosatsaq, qalada júzdegen jumys ornyn berip otyrǵan kásipkerge de jeńildik jasaý kerek bolady. Sondyqtan ony dıskrımınatsııalyq norma retinde sanaýy múmkin. Máselen, fermerge de, kásipkerge de osy avtokólik kerek. Bul rette, birine jeńildik jasap, basqasyna salyq salý — durys emes, — dedi Erjan Birjanov Májilistiń jalpy otyrysynan keıin tilshiler suraǵyna jaýap bere otyryp.

Vıtse-mınıstrdiń aıtýynsha, qazir fermerlerdiń kóbi jańa ári qozǵaltqysh kólemi joǵary jol talǵamaıtyn avtokólikter satyp alyp jatyr.

— Bul jańa kólikterdi salyqtan bosatý — basqa adamdardyń aldynda ádil bolmaıdy. Al eski kólikterge toqtalsaq, paıdalaný merzimi 20 jyldan asqan jol talǵamaıtyn (joǵary salyq tóleıtin) kólikter úshin salyqtyń jartysyn tóleıtindeı túzetýler (jańa Salyq kodeksiniń jobasy) engizip otyrmyz. Al 10 jyldan asqan avtokólikterge salyq 30 paıyzǵa azaıady. Fermerdiń barlyǵyn jol talǵamaıtyn bir kóligine salyqtan bosatýdy durys emes dep sanaımyn, — dedi Erjan Birjanov.

Aıta keteıik, búgin Májilistiń jalpy otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın bul usynysty pysyqtaýǵa bolatynyn aıtqan edi.