Fermerlerdiń sý tapshylyǵyna qatysty máselelerin sheshý jumysy turaqty júrgizilýi tıis - Bektenov
ASTANA. KAZINFORM – Aýyl sharýashylyǵynda sý únemdeıtin tehnologııalardy belsendi engizý qajet. Bul týraly Úkimet otyrysynda Premer-mınıstri Oljas Bektenov aıtty.
- Vegetatsııalyq kezeńniń bastalýyn eskere otyryp, Sý resýrstary jáne ırrıgatsııa mınıstrligi múddeli memlekettik organdarmen birge ońtústik óńirlerdi eginge qajetti sýmen turaqty qamtamasyz etý jóninde sharalar qabyldasyn. Aýyl sharýashylyǵynda sý únemdeıtin tehnologııalardy belsendi engizý qajet, - dedi Úkimet basshysy.
Onyń atap ótýinshe, sý tapshylyǵynyń qaýpi joǵary óńirlerdi basym tártippen qarjylandyrýdy qarastyryp, dıqandardy tamshylatyp jáne jańbyrlatyp sýarý júıesine kóshýge yntalandyratyn keshendi sharalardy iske asyrý kerek.
- Birqatar ońtústik aýdanda fermerler tarapynan sý tapshylyǵyna qatysty shaǵymdar tirkelýde. Mundaı máselelerdi sheshý jumystary turaqty túrde júrgizilýge tıis. Qoryta aıtqanda, Aýyl sharýashylyǵy mınıstrligi oblys ákimdikterimen birge egis jumystarynyń ýaqtyly aıaqtalýyn jáne jazǵy egis naýqanynyń sapaly ótýin baqylaýdy qamtamasyz etýi qajet, - dedi Oljas Bektenov.
Buǵan deıin Premer-mınıstr eginshilerge ózekti meteorologııalyq boljamdardy ýaqtyly berýdi tapsyrǵan edi.
