Fermerlerdi qarjylaı qoldaý kúsheıedi: kredıtter men lızıngti sýbsıdııalaý qaǵıdasy ózgerdi
ASTANA. KAZINFORM – Qazaqstanda agrarlyq sektordy memlekettik qoldaý tıimdiligin arttyrý boıynsha jańa sharalar qabyldandy. Bul týraly Joǵarǵy aýdıtorlyq palata málim etti.
2024 jylǵy jeltoqsanda Joǵary aýdıtorlyq palata aýyl sharýashylyǵyn sýbsıdııalaýǵa bólingen bıýdjet qarajatynyń paıdalanylý tıimdiligine aýdıt júrgizdi. Aýdıt qorytyndysy boıynsha QR Aýyl sharýashylyǵy mınıstrligine agroónerkásiptik keshendi memlekettik qoldaýdyń ashyqtyǵy men nátıjeliligin arttyrýǵa baǵyttalǵan naqty tapsyrmalar berildi.
Osy tapsyrmalardy oryndaý sheńberinde Aýyl sharýashylyǵy mınıstrligi birqatar negizgi bastamany iske asyrdy.
Máselen, vedomstvonyń 2023-2027 jyldarǵa arnalǵan damý jospary jańartyldy. Ol jerdi turaqty paıdalanýǵa jáne topyraq qunarlylyǵyn qalpyna keltirýge basa nazar aýdara otyryp qaıta qaraldy. Kómirtekti eginshilikti damytýdyń jol kartasy ázirlendi, bul ekologııalyq taza óndiriske mańyzdy qadam bolmaq.
— Kredıtter men lızıngti sýbsıdııalaý qaǵıdalary ózektendirildi. Normatıvtik qujattarǵa ózgerister engizildi. Eskirgen erejeler alynyp tastaldy, bul retteýdiń dáldigin arttyryp, fermerlerdiń qarjylyq qoldaýǵa qol jetkizýin jeńildetedi, — delingen habarlamada.
Mal sharýashylyǵyn qoldaý sharalary túzetildi. Asyl tuqymdy jáne selektsııalyq jumystarǵa sýbsıdııalar alynyp tastaldy. Sonymen qatar taýyq etine memlekettik qoldaý endi ónimdi respýblıka ishinde satý jaǵdaıynda ǵana qoljetimdi bolady. Bul elimizdiń azyq-túlik qaýipsizdigin nyǵaıtýǵa múmkindik beredi. Memlekettik aýdıt qorytyndylary boıynsha berilgen basqa da tapsyrmalardyń oryndalýy Joǵary aýdıtorlyq palatanyń baqylaýynda.
Aıta keteıik, agrosýbsıdııany maqsatqa saı paıdalaný tetigine baqylaý kúsheıedi.