Fermerlerdiń bir avtokóligine salyq boıynsha jeńildik bolady

ASTANA. KAZINFORM — Jańa Salyq kodeksi aıasynda fermerlerdiń jol talǵamaıtyn bir kóligin salyqtan bosatý normasy qoldaý tapty. Bul týraly Qarjy vıtse-mınıstri Erjan Birjanov aıtty.

Búgin Parlament Májilisinde ótken baspasóz máslıhatynda tilshiler Qarjy mınıstrligi fermerlerdiń bir kóligin salyqtan bosatý usynysyna qarsylyq bildirgenin eske salyp, osy normaǵa qatysty surady.

- Bul norma qabyldandy. Fermerdiń bir avtokóligine tıisti jeńildik bolady, - dedi Erjan Birjanov.

Sonymen qatar vıtse-mınıstr jańa Salyq kodeksi aıasynda avtokólikke qatysty birqatar ózgeris engizilgenin aıtty.

- Jalpy, eski kólikterge - paıdalaný merzimi 20 jyldan asqan kólikter úshin salyqtyń jartysyn tóleıtindeı túzetýler engizildi. Al 10 jyldan asqan avtokólikterge salyq 30 paıyzǵa azaıady, — dedi Erjan Birjanov.

Eske salsaq, bıyl sáýir aıynda Májilis depýtaty Erbolat Satybaldın aýyldaǵy fermerlerdiń jol talǵamaıtyn bir kóligin salyqtan bosatýdy usyndy.

Óz kezeginde Erjan Birjanov bul usynyspen kelispeıtinin málim etti.

— Meniń oıymsha, osyndaı jeńildik berý durys emes. Sebebi fermerdiń bir kóligin salyqtan bosatsaq, qalada júzdegen jumys ornyn berip otyrǵan kásipkerge de jeńildik jasaý kerek bolady. Sondyqtan ony dıskrımınatsııalyq norma retinde sanaýy múmkin. Máselen, fermerge de, kásipkerge de osy avtokólik kerek. Bul rette, birine jeńildik jasap, basqasyna salyq salý — durys emes, — dedi E. Birjanov.

Aıta keteıik, búgin Parlament jańa Salyq kodeksin bekitti.