Fermerlerdiń birigýi esebinen aýylda jumyssyzdyq qysqarýda - QR AShM

ASTANA. QazAqparat - Agroónerkásip keshenin damytýdyń memlekettik baǵdarlamasy aıasynda aýyl sharýashylyǵy kooperatıvterin qurý - aýyldardaǵy jumyssyzdyqty qysqartýǵa yqpal etýde. Búgin Úkimette ótken baspasóz máslıhatynda QR Aýyl sharýashylyǵy birinshi vıtse-mınıstri Qaırat Aıtýǵanov osylaı málim etti, dep habarlaıdy QazAqparat.

«Aýyl sharýashylyǵy kooperatsııasy bizdiń baǵdarlamanyń negizgi bóligi. Búginde shaǵyn ári orta sharýashylyqtardy aýyl sharýashylyǵy kooperatsııasyna tartý belsendi túrde júrip jatyr. Eger de 2017 jyldyń qorytyndysy boıynsha Qazaqstan aýmaǵynda 326 kooperatıvti qurý mejesin belgilesek, 1 tamyzdaǵy jaǵdaı boıynsha 517 kooperatıv quryldy. Atap aıtqanda, aýyldardaǵy jumyspen qamtylý sekildi mańyzdy másele osy baǵdarlamanyń arqasynda sheshilip jatyr»,-dedi Aıtýǵanov.

Onyń aıtýynsha, osy 517 kopperatıv 53,5 myń jeke sharýa qojalyq pen usaq jáne orta sharýashylyqtardy, sondaı-aq otbasylyq bordaqylaý alańdaryn qamtyp otyr.

Belgili bolǵandaı, aýyl sharýashylyǵy kooperatıvteri úshin kepilzatsyz jáne bastapqy jarnasyz modýldik sút qabyldaýshy jáne bordaqylaý pýnkterin alý júıesi jasaldy. Sonymen qatar kooperatıvter múshelerine nesıe alý tetikteri qarastyryldy.