Fermerlerden astyq alýǵa paıyzsyz bıýdjettik zaımdar qajet - Qashqymbaev
ASTANA. QazAqparat - Astyq satyp alý úshin «Azyq-túlik kelisimshart korporatsııasy» UK» AQ-na paıyzsyz bıýdjettik zaımdar qajet. Bul týraly Parlament Májilisi Agrarlyq máseleler komıtetiniń otyrysynda atalǵan korporatsııa basqarma tóraǵasynyń orynbasary Sábıt Qashqymbaev málim etti, dep habarlaıdy QazAqparat.
«Eger de bıýdjet tarapynan paıyzsyz teńge zaımdary bolsa, onda naryqty jetkilikti deńgeıde qamtı alar edik. Barlyq másele nesıeleýge qatysty. Qarjyny bankterden tartqan jaǵdaıda paıyzdyq ústemesi joǵary, al valıýtamen alsaq, valıýtalyq táýekelderge tap bolamyz. Sondyqtan da zaımdyq qarjyǵa astyq satyp alý bizge tıimsiz», - dep túsindirdi S. Qashqymbaev.
Onyń sózine qaraǵanda, búginde korporatsııa 270 myń tonna astyq satyp aldy jáne bul kórsetkishti 330 myń tonnaǵa deıin jetkizý josparlanyp otyr. Qytaı men Iran baǵyttaryna jetkizýge sharttardy oryndaý úshin arpa men joǵary proteındi bıdaı satyp alynýda.
Qazirgi kezde «Azyq-túlik kelisimshart korporatsııasynda» 800 myń tonna kóleminde astyqtyń ótpeli qory bar. Sonymen qatar mindettemelerdi astyqpen qaıtarý iske asyrylady dep kútilýde jáne qordyń kólemi mıllıon tonnaǵa jetedi. Sondyqtan da kommertsııalyq turǵyda astyqty ary qaraı satyp alýdyń eshqandaı máni joq.
Budan buryn habarlanǵandaı, Qazaqstannyń astyq óndirýshi oblystarynyń fermerleri astyqty ótkizýde keıbir qıyndyqtarǵa tap bolǵan edi.
