Fermerlerden astyqty tikeleı satyp alýǵa qosymsha 75 mlrd teńge bólinedi

ASTANA. KAZINFORM – Fermerlerden astyqty tikeleı satyp alýǵa qosymsha 75 mlrd teńge bólinedi. Bul týraly Májilis depýtattarynyń saýalyna Premer-Mınıstrdiń orynbasary Serik Jumanǵarınniń jaýabynda aıtylǵan.

— Astyq naryǵyna retteýshilik yqpal kórsetý maqsatynda «Azyq-túlik kelisimshart korporatsııasy» UK» AQ (Azyq-túlik korporatsııasy) fermerlerden astyq satý boıynsha sharalar qabyldap jatyr. Bıylǵy forvardtyq kelisimsharttar boıynsha, sonymen qatar ótken jylǵy merzimin uzartýdy eskere otyryp, Azyq-túlik korporatsııasy 1,2 mln tonna astyq satyp alady. Qazirgi ýaqytta elevatorlarǵa 705 myń tonna astyq nemese 59 paıyzy tústi, — dedi vıtse-premer jaýabynda.

Onyń atap ótýinshe, Memleket basshysynyń Aýyl sharýashylyǵy qyzmetkerleriniń birinshi forýmynda bergen tapsyrmasyn oryndaý aıasynda Azyq-túlik korporatsııasy jańa ónimniń astyǵyn fermerlerden tikeleı satyp alady. 

— Birinshi kezeńde Úkimet rezerviniń 10 mlrd teńge mólsherindegi qarajaty esebinen naryqtyq baǵamen 150 myń tonna ónim satyp alynady. Jalyp, bul maqsatqa qosymsha 75 mlrd teńge bólý josparlanyp otyr. Sondaı-aq bul máselesi osy jyldyń 19 qarashasynda Úkimet otyrysynda qaraldy», — dedi Serik Jumanǵarın.

Aıta keteıik, Úkimet basshysy orynbasarynyń jaýabyna qosymsha berilgen aqparatqa sáıkes, 3-synypty bıdaı — 75 000-90 000 teńge, 4-synypty bıdaı — 55 000-65 000 teńge, 5-synypty bıdaı — 50 000 teńge, 2-synypty arpa — 50 000 teńge.

Buǵan deıin astyq eksporttaıtyn sharýalarǵa sýbsıdııa beriletindigin jazǵan edik.