Fermerler sýǵa ótinishti endi tsıfrlyq júıe arqyly rásimdeıdi
ASTANA. KAZINFORM — Túrkistanda sý berý kelisimsharttary onlaın formatqa kóship jatyr. Bul týraly Sý resýrstary jáne ırrıgatsııa mınıstrliginiń baspasóz qyzmeti habarlady.
Túrkistan oblysynda sýarý sýyn jetkizýge arnalǵan kelisimsharttardy tsıfrlyq júıe arqyly rásimdeý boıynsha túsindirý jumystary júrgizilip jatyr
Sý resýrstary jáne ırrıgatsııa mınıstrligi, «Sý resýrstary aqparattyq-taldaý ortalyǵy» KEAQ jáne «Qazsýshar» RMK mamandarynan quralǵan jumys toby Túrkistan oblysynyń Jetisaı, Maqtaaral, Shardara, Sozaq jáne Otyrar aýdandarynda jańa bıllıng aqparattyq júıesin pılottyq rejımde engizýdi bastady.
Mamandar sharýalarmen, kanal basshylarymen jáne sý paıdalanýshylar birlestikteriniń ókilderimen kezdesip, jańa júıeniń jumys qaǵıdalaryn tanystyryp jatyr.
Sonymen qatar pılottyq aýdandarda týyndaǵan tehnıkalyq jáne uıymdastyrýshylyq máseleler sheshilip, sý esebi men qyzmet kórsetý protsesin tsıfrlandyrýǵa birtindep kóshý qamtamasyz etilip jatyr. Júıeniń negizgi maqsaty — qujat aınalymyn jáne fermerler men sý paıdalanýshylardyń sýarýǵa sý berý jónindegi ótinishterin tolyǵymen tsıfrlyq formatqa kóshirý.
Tsıfrlyq platforma sondaı-aq onlaın túrde tólem júrgizýge jáne kórsetilgen qyzmetter boıynsha oryndalǵan jumys aktilerin alýǵa múmkindik beredi. Júıe Biryńǵaı jer kadastrymen, salyq júıesimen jáne Sý resýrstarynyń ulttyq aqparattyq júıesimen ıntegratsııalanady. Bul paıdalanýshylardyń qatysýynsyz barlyq qajetti derekterdi avtomatty túrde alýǵa jaǵdaı jasaıdy.
Ótinishter elektrondyq tsıfrlyq qoltańba arqyly birneshe mınýtta resimdeledi, al elektrondy kelisimshart sý berý kezegin avtomatty túrde anyqtaıdy. Tólemder mobıldi qosymshalar nemese ınternet-bankıng arqyly júzege asyrylady. Barlyq qujat pen qarjylyq operatsııa paıdalanýshynyń jeke kabınetinde qoljetimdi bolady.
— Tsıfrlyq bıllıng platformasyn engizý sý sharýashylyǵy protsesteriniń ashyqtyǵy men tıimdiligin arttyrady. Júıe sý berý jáne tutyný kólemderin naqty baqylaýǵa, sondaı-aq sý resýrstaryn tıimdi josparlaý men basqarýǵa múmkindik beredi, — dedi Sý resýrstary aqparattyq-taldaý ortalyǵynyń basqarma tóraǵasy Qaıratǵalı Haırýlla.
Osyǵan deıin Oljas Bektenov egis alqaby bekitilgen kesteden 1 gektar artyq egilse, onda fermerlerge 1 tamshy da sý berilmeıtinin eskertti.