Fermerler sýbsıdııa aqshasyn «jep» qoımas úshin ne isteý kerek
PAVLODAR. KAZINFORM — Otandyq aýyl sharýashylyǵyn sýbsıdııalaý salasyndaǵy jemqorlyq, bıýdjet qarajatyn urlaý — ulttyq ekonomıkanyń ósýine tejeý. Úkimet 2025 jyldan bastap sýbsıdııa tártibi ózgeretini týraly málim etken. Jańashyldyqtyń biri aýyl sharýashylyǵy tehnıkasyna bólingen nesıeniń paıyzyn sýbsıdııalaý talaptaryna qatysty.
Sońǵy ýaqytta aýyl sharýashylyǵy salasyn sýbsıdııalaý boıynsha jemqorlyq táýekelderi azaımaı tur. Buǵan deıin jazǵanymyzdaı, Pavlodar oblysynda agroónerkásip kesheni boıynsha memleketke 500 mln teńge shyǵyn kelgen.
Óńirlik prokýratýradan málim etkendeı, keıbir jaǵdaılarda aýyl sharýashylyǵy tehnıkasyn satyp alý týraly esep berý aqparaty burmalanady. Іs júzinde sýbsıdııa protsesi tek formaldy túrde ótinim qabyldap, bıýdjet qarajatyn bólýden turady.
Mysaly, eki aýylsharýashylyǵy taýaryn óndirýshi zańsyz baıý úshin jalpy somasy 132 mln teńgege tehnıka satyp alýǵa sýbsıdııa alyp, keıinnen basqa maqsatqa jumsaǵan.
Májilis depýtaty, agrarlyq máseleler jónindegi komıtet múshesi Nurjan Áshimbetovtiń pikirinshe, agrosektordy qarjylandyrýǵa qatysty másele sýbsıdııaǵa bólinetin qarajattyń baqylanbaýynan týyndap otyr.
— Otandyq fermerlerdi zamanǵa saı tehnıkamen, qural-jabdyqtarmen qamtamasyz etip otyrǵan «QazAgroQarjy» AQ, «Agrarlyq nesıelik korporatsııasy» AQ, «Damý» qory jáne ózge de qarjylyq uıymdardyń sýbsıdııany baqylaý boıynsha tetikteri jasalmaǵan. Tehnıkany nesıege nemese lızıngke beredi de, memleketten bólinetin bıýdjet qarajatynyń nysanaǵa jetýin qadaǵalamaıdy. Osynyń saldarynan qanshama fermer nesıeni sýbsıdııalaý kezindegi qarajatty ózge maqsatqa jumsap keldi. Negizinen sýbsıdııa tehnıkaǵa ǵana emes, mıneraldy tyńaıtqysh pen gerbıtsıdter, tuqym men sý satyp alýǵa da bólinedi. Bıyl agrosektordy sýbsıdııalaýǵa 450 mlrd teńge qarajat bólindi. Bul — óte kóp qarajat. Aldaǵy jyldary bul soma odan saıyn eselene túsetini anyq, — deıdi depýtat.
Nurjan Áshimbetovtiń aıtýynsha, Úkimet usynyp otyrǵan jańa tártip boıynsha 2025 jyldan bastap sýbsıdııa qarajaty sharýanyń qatysýynsyz tikeleı qaryz berýshige túsedi.
ıAǵnı, jergilikti ákimdikter men jaýapty basqarma barlyq resimdeýlerdi ózderi júrgizip, sharýa tek qol qoıady. Atqarýshy bılik sýbsıdııanyń resimdelgen sátinen tólengenge deıindi úderisin elektrondy qujat aınalymy arqyly baqylap otyra alady.
Al Pavlodar oblysy aýyl sharýashylyǵy basqarmasynyń málimetine súıensek, bıyl egin sharýashylyǵyn qoldaýǵa 7,5 mlrd teńge bólingen. Qarajattyń kóp bóligi tuqym sharýashylyqtaryn qoldaý men mıneraldy tyńaıtqysh baǵasyn arzandatýǵa jumsalǵan.
Deıturǵanmen atalǵan qarajat jergilikti fermerler úshin az bolyp shyqqan. Basqarma oblys ákiminen sharýalar úshin qosymsha 3,9 mlrd teńge qarajat bólýdi surap otyr.
Sharýalar zamanǵa saı aýyl sharýashylyq tehnıkasy men qural-jabdyq satyp alýy úshin «Báıterek» ulttyq basqarýshy holdınginiń qarjylyq uıymdary 26,4 mlrd teńgege, «QazAgroQarjy» 16 mlrd teńgege qarjylandyrǵan.
Nátıjesinde oblys fermerleri jańadan 1 myńǵa jýyq tehnıka men túrli jabdyqtar satyp alǵan.
Eske sala keteıik, keshe ǵana Almaty oblysynda jalǵan kooperatıv quryp, 1,2 mlrd teńge sýbsıdııany jymqyrdy degen aıyppen tanymal fermer Almasbek Sadyrbaı ustalǵan edi.
