Fermerler saqtandyrý kompanııalaryn aldap júr - AShM
ASTANA. QazAqparat - Búginde keıbir pysyqaı fermerler búlingen egis alqaptaryn asyra kórsetip, saqtandyrý aqysyn kóptep alyp jatady, dep xabarlaıdy QazAqparat tilshisi.
QR Aýyl sharýashylyǵy vıtse-mınıstri Qaırat Aıtýǵanovtyń aıtýynsha, qazirgi kezde egistiń búlingenin arnaıy komıssııa rastaıdy. Alaıda onyń arnaıy qural-jabdyqtary joq. Sonyń saldarynan fermerler saqtandyrý kompanııalaryn aldap, az alqapqa kóp aqsha alyp otyrady. «Máselen, bir sharýa qojalyǵy 500 gektar jerde dándi-daqyldardyń búlingenin rásimdep aldy. Alaıda arnaıy jumys toby atalǵan ýchaskeniń aryz berýshiniń ıeligine jatpaıtynyn anyqtady. Budan bólek, jer 500 gektar emes, 400 gektar bolyp shyqty. Sonyń tek 150 gektaryna ǵana daqyldar egildi. Al búlingen daqyldardyń jalpy kólemi 20 gektardan aspady. Sonda saqtandyrý boıynsha 40 myń teńge tólenýi kerek. Al fermer 750 myń teńgeni jasap aldy», - dedi Q.Aıtýǵanov Úkimettiń búgingi otyrysynda.
Aýyl sharýashylyǵy qazirgi saqtandyrý júıesin ózgertýdi usynyp otyr. «Birinshiden, ósimdik sharýashylyǵy salasynda mindetti saqtandyrý júıesin elektrondy formatqa aýystyrý qajet. Qazirgi minagro.kz platformasy elektrondy bazalarǵa qosylǵan. Sonyń arqasynda barlyq málimetterdi tekserip otyrýǵa bolady. Máselen, jer kadastrymen ıntegratsııalaýdyń nátıjesinde saqtandyrýǵa bógde bireýdiń jerin ótkizýge jol berilmeıdi. Al jerdi qashyqtan zondaý júıesi daqyldardyń ósýi jáne taǵy basqa kórsetkishterdi baqylaýǵa múmkindik beredi. Osylaısha, biryńǵaı elektrondy júıe dándi-daqyldardyń jaǵdaıyn, ósý dınamıkasy men naqty shyǵyndardyń kólemin kórsetedi», - dep atap kórsetti Q.Aıtýǵanov.
Úkimet basshysy mınıstrliktiń osy usynysyn qoldady. Baqytjan Saǵyntaev barlyq usynystardy eskerip, Mınıstrler kabınetine daıyn qujat retinde engizýdi tapsyrdy.
