Fermerler Reseı astyǵyn Qazaqstandyki dep Iran men Aýǵanstanǵa ótkizip kelgen
PAVLODAR. KAZINFORM — Zańsyz astyq ımporty boıynsha óńirdegi sharýa qojalyqtaryna qatysty 12 qylmystyq is tirkelgen. Onyń ishinde memleketke 4,1 mlrd teńge zalal keltirgen 10 qylmystyq is sotta qaraldy.
Pavlodar oblysy boıynsha ekonomıkalyq tergep-tekserý departamenti eń qaýipti ári kúdikti qarjylyq operatsııalardy taldaı kelip, 30 qylmysty anyqtaǵan.
Bul zańbuzýshylyqtar boıynsha qylmystyq jaýapkershilik QR Qylmystyq kodeksiniń 216-babynda aıqyn kórsetilgen.
Kelgen zalal 6 mıllıard teńgeden asqan.
Onyń 300 mıllıon teńgesi tergeý protsesi kezinde óteldi.
— Kórshiles memleketterde, atap aıtqanda, Reseıde óndirilgen astyqty úlken kólemde elge ákelip, jalǵan shot-faktýra jasaý arqyly Taıaý Shyǵys elderine qazaqstandyq ónim retinde eksportqa shyǵaryp jatqandar anyqtaldy. Olar ónimdi kóbine Aýǵanstan, Iran, Tájikstan sııaqty memleketterge jiberedi. Bul bizdiń otandyq ekonomıkamyzǵa, óńirimizdiń sharýa qojalyqtaryna aıtarlyqtaı zııan keltirip otyr. Ózimizdiń ónimderimiz shetelge shyqpaı qalady nemese satylǵan kúnde de baǵasy tómendep ketedi. Sondyqtan da mundaı zańsyz is-áreketter bizdiń ulttyq ekonomıkamyzǵa úlken zalal keltiredi, — deıdi Pavlodar oblysy boıynsha ekonomıkalyq tergep-tekserý departamentiniń basshysy Erik Esenov.
Oblystaǵy júıeli problemalardyń biri — zańsyz astyq ımporty. Bul rette sharýa qojalyqtaryna qatysty 12 qylmystyq is tirkelgen.
Onyń ishinde memleketke 4,1 mlrd teńge zalal keltirgen 10 qylmystyq is sotqa joldanyp, qaraldy.
Atap aıtqanda, olardyń biri — «Ertis» sharýa qojalyǵy. Basshysy jalǵan shot-faktýra jasaý esebinen 50 mıllıon teńgege jýyq kiris tapqan.
Ol bul qarajatqa Toyota Camry avtokóligi men Pavlodardaǵy elıtalyq turǵyn úı kesheninen páter satyp alǵan.
Sharýa qojalyǵy basshysy úsh jylǵa bas bostandyǵynan aıyrylyp, múlki tárkilendi.
Taǵy bir kásiporyn — «Vostok» JK ókilderi bir jarym jylǵa bas bostandyǵynan aıyryldy.
Olar «Damas» ShQ, «Dııar», «Altyn Bıdaı», «Sever», «Ansar» JK jáne «Ansar_ANSAR» JShS-teri úshin dándi jáne dándi-burshaqty daqyldar boıynsha jalǵan shot-faktýra daıyndap otyrǵan.
Qylmystyq tabys somasy 50 mıllıon teńgeni quraǵan.
Eske sala keteıik, munyń aldynda zańsyz spırt óndirgen zaýyt basshysy bılikke 20 myń dollar para usynǵan edi.
