Fermerler «QazAgro» arqyly 224 myń analyq bas mal satyp alady dep josparlanýda
ASTANA. 19 qazan. QazAqparat - 5 jylda fermerlerdiń 224 myń analyq bas mal satyp alýy josparlanýda.
Bul týraly búgin Astanada «QazAgro» ulttyq basqarýshy holdıngi» aktsıonerlik qoǵamynyń basqarma tóraǵasy Dýlat Aıtjanov Mal sharýashylyǵyn damytý salasyndaǵy ahýaldy zerdeleý maqsatynda ótken «Nur Otan» HDP Jemqorlyqpen kúres jónindegi respýblıkalyq qoǵamdyq Keńestiń otyrysynda málim etti.
«Etti jáne tıimdiligi joǵary iri-qara mal basyn kóbeıtý maqsatynda bes jyl ishinde fermerlik sharýashylyqtar «QazAgro» arqyly 224 myń analyq bas mal satyp alady josparlanýda. Osy maqsatta «Sybaǵa» atty jeńildikpen nesıelendirýdiń arnaıy baǵdarlamasy jasaldy. 2011 jyly jospar boıynsha 40 myńǵa tarta mal basy satyp alynady dep kútilgenimen, ol kórsetkish 55 myńnan asyp ketti. Bıyl 50 myńnan astam mal basy satyp alyndy. Sonymen qatar holdıng otandyq sharýashylyqtarda asyl tuqymdy mal basyn arttyrý maqsatynda shetelden asyl tuqymdy maldy satyp alý boıynsha jumystardy atqaryp keledi. 2011 jyly 13 myńnan astam asyl tuqymdy mal shet elden satyp alynǵan. Aǵymdaǵy jyly 7,7 myń mal ákelingen. Taǵy 10 myńyn satyp alý josparda bar», - deıdi D. Aıtjanov.
«QazAgro» basshysynyń aıtýynsha, holdıng ashylǵaly kompanııa toptarynyń aktıvi 2,8 ese, jeke kapıtal - 3 ese, tabys - 2,5 ese ósken. Sońǵy bes jylda holdıng Qazaqstannyń agroónerkásip salasyna 1 trıllıon teńgeden astam qarjy quıǵan, onyń 21 paıyzy respýblıkalyq bıýdjet qarjysy bolsa, 79 paıyzy jeke kapıtal nemese ishki ınvestıtsııalardyń úlesi. Qazirgi ýaqytta holdıngtiń ınvestıtsııalyq qorjynynda 196 mıllıard teńge bolatyn 254 joba bar. Holdıng agroónerkásiptik salaǵa salynǵan qarjynyń jalpy kredıttik úlesinen 47 paıyzdy ıemdenip otyr.
