Fermerler Eýroparlament ǵımaratynyń aldynda búlik shyǵardy

ASTANA. KAZINFORM – Brıýsselde Eýropa Odaǵy men Merkosýr elderi arasyndaǵy saýda kelisimine qarsy narazylyqtar jalǵasyp jatyr. Keıbir sherýshiler Eýroparlament ǵımaratynyń aldyndaǵy shyrshany qulatyp, ornyna janyp jatqan dóńgelekter men qoqystardy qoıǵan, dep habarlaıdy Kazinform tilshisi politico.eu-ge silteme jasap. 

Narazylyq sharalary Eýroodaqqa múshe 27 memleket basshylarynyń kezdesýine jaqyn jerde ótip jatyr. 

Jergilikti polıtsııa qyzmetkerleri Lıýksembýrg alańynda jarylystyń aldyn alýǵa tyrysty.  Eýropalyq kvartaldy qoıý tútin basyp, bılik ókilderi demonstranttardy taratý úshin kúni boıy kózden jas aǵyzatyn gaz qoldandy. 

Narazylyq bildirýshilerdiń bir bóligi ǵana zorlyq-zombylyqqa bardy, al keıbir beıbit sherýshiler Eýroodaq basshylaryna óz talaptaryn aıtty.

– Azyq-túliktiń jetkilikti mólsherde óndiriletinin qabyldaımyz. Alaıda fermerler shyǵynmen ónim óndirýdi jalǵastyra almaıdy, - dedi Veksfordtaǵy (Irlandııa) iri qara mal jáne egin sharýashylyǵymen aınalysatyn fermer Elıs Doıl. 

Bıylǵy jaz aıynda Eýropalyq komıssııa aýyl sharýashylyǵyna jumsalatyn shyǵyndardyń kepildendirilgen deńgeıi tómendetilgenin aıtty. Sondaı-aq komıssııa ókilderi 300 mıllıard eýroǵa jýyq jańa kórsetkish shyǵyndardyń eń tómengi deńgeıin bildiredi dep sendirdi. Biraq fermerler buǵan senbeıdi. 

Belgııalyq BAQ-tyń habarlaýynsha, Eýroparlament ǵımaratyn qorǵaıtyn qorshaýlardyń aldynan polıtsııa qyzmetkerlerine kartop úıindileri laqtyrylǵan. Polıak fermerleri Eýroparlament ǵımaratynda petardalardy ushyryp jatqanda, sheneýnikterter qyzmetkerlerge tereze mańyna jaqyndamaý týraly elektrondyq hattar jiberdi. 

Eýropalyq kóshbasshylar Ýkraınaǵa 2026-2027 jyldarǵa qarjylaı kómek kórsetý máselesin aǵymdaǵy sammıtte sheshedi dep kútilip otyr. Degenmen úlken kólemdegi qarajatty tartý joly belgisiz kúıinde qalyp otyr. 

Eske sala keteıik, buǵan deıin Eýroparlament «áskerı Shengen aımaǵyn» qurý týraly rezolıýtsııa jobasyn daıyndaǵanyn jazǵan edik.