Fermerler egin egýge úlgermeýi múmkin - senator
ASTANA. KAZINFORM — Tasqyn sýdan zardap shekken aımaqtardaǵy dıqandar egis naýqanyn ýaqytynda bastaı almaýy múmkin. Bul týraly Senattyń jalpy otyrysynda depýtat Arman Óteǵulov aıtty.
Depýtat qazirgi jaǵdaı jedel áreket etýdi qajet etetinin atap ótti. Óıtkeni kóktemniń ár kúni jylǵa azyq. Búkil elimizdi azyq-túlikpen qamtamasyz etýde ár kún mańyzdy.
«Sý basqan jerler astyq egetin óńirlerge tıesili bolǵandyqtan, kóktemgi egis naýqanyn durys ótkizýge qatysty suraqtar týyndap otyr. Qazirdiń ózinde egin salý merziminiń uzaryp ketý qaýpi bar. Al, baý-baqsha, kókónis ósirýshilerdiń, saıajaı seriktestikteriniń jaǵdaıy óte nashar. Olardyń tehnıkalary, sýarý júıeleri men transformatorlary zaqymdaldy, jylyjaılar buzyldy, alqaptary sý astynda qalǵanyn kórip otyrmyz. Jedel derekter boıynsha Aqtóbe, Qostanaı men Soltústik Qazaqstan oblystarynda 200 tonnaǵa jýyq tuqym qoımalaryn sý basqan. Ókinishke qaraı, Aýyl sharýashylyǵy mınıstrligi qazirge deıin elimizdegi sý astynda qalǵan egistik týraly naqty málimet bergen joq», - dedi Arman Óteǵulov Úkimet basshysy Oljas Bektenovtiń atyna joldaǵan saýalynda.
Senator mal sharýashylyǵynyń shyǵyny men asa qaýipti ınfektsııalardyń paıda bolý qaýpine, sý tapshylyǵynyń aldyn alýǵa qatysty máselelerdi kóterdi. Arman Óteǵulov osyǵan baılanysty elimizdiń Premer-Mınıstrinen bul máseleler boıynsha aqparat berýdi surady.
«Qazir sý basqan óńirlerdegi zardap shekken egistiktiń kólemi qandaı? Qansha egistik tasqynnyń saldarynan aınalymnan shyqty? Fermerler bıyl egin egýge úlgere ala ma? Egis egip úlgermegen sharýalarǵa alatyn paıdasy qalaı óteletin bolady? Shyǵyn bolǵan mal basyn toltyrýdyń tetigi bar ma? Qansha aýyl sharýashylyǵy tehnıkasy sýǵa ketip, isten shyqty, olardy qalpyna keltirý jumystary qalaı júrgiziledi?»,- dep surady senator Óteǵulov.
