Fermerler egis naýqanyna qajetti resýrstarmen qamtamasyz etilgen - AShM

NUR-SULTAN. QazAqparat – Egis naýqanyn tabysty ótkizý úshin fermerler barlyq qajetti resýrstarmen - tuqym, mıneraldy tyńaıtqyshtar, janar-jaǵar maı, tehnıkamen jáne qarjy quraldarymen qamtamasyz etilgen. Bul baǵyttaǵy qarjy kólemi 140 mlrd teńgege jetkizildi, dep habarlaıdy QazAqparat QR Aýyl sharýashylyǵy mınıstrligine silteme jasap.

Vedomstvo basshysy Erbol Qarashókeev Túrkistan oblysynda bolyp, «Egisten sórege deıin» jobasy aıasyndaǵy aýyl sharýashylyǵy ónimderin ótkizý naryǵyn keńeıtý jónindegi respýblıkalyq semınar-keńeske qatysty. Sondaı-aq, oblystyq aýyl sharýashylyǵy taýar óndirýshileriniń «Bir alqaptan jylyna 2-3 ónim alý jobasy» aıasyndaǵy erte pisetin ónimder kórmesimen tanysty.

Mınıstr atap ótkendeı, egis naýqanyn ýaqytyly jáne sapaly ótkizý - Prezıdent qoıǵan basym mindetterdiń biri. Osy oraıda, kóktemgi egis jumystaryna daıyndyq josparly túrde júrgizilip jatyr. Bul másele aýyl sharýashylyǵy mınıstrliginiń erekshe baqylaýynda.

Sonymen qatar, mınıstrlik júıeli negizde azyq-túlik taýarlary qoryna monıtorıng, óndiris pen tutyný teńgerimin júrgizedi.

«Qajet bolǵan jaǵdaıda biz óńirlerdi qajetti ónimdermen tolyq qamtamasyz etý maqsatynda oblystar arasynda taýarlardy qaıta bólýdi júzege asyramyz»

, - dedi mınıstr.

Aıta ketsek, ákimdikterdiń 20 sáýirdegi derekteri boıynsha respýblıkada kartop qory - 204 myń tonna, sábiz - 44,7 myń, qyryqqabat - 28,6 myń, pııaz - 36 myń tonna.

Mınıstr Túrkistan oblysynda kólemi shamamen 198 myń tonnany quraıtyn erte pisetin qyryqqabatty jınaý jumystary bastalǵanyna, sondaı-aq mamyr aıynyń ortasynan maýsymǵa deıin 174 myń tonna kóleminde erte pisetin kartop jáne maýsym aıynda 45 myń tonna sábiz, 55 myń tonna pııaz jınaý kútilip otyrǵanyna nazar aýdardy.

«Bul rette jemis-kókónis pen erte pisetin ónimderdi óndirý úshin jetkilikti jumys kúshi bar Túrkistan oblysynyń áleýeti zor jáne respýblıkalyq aýqymdaǵy negizgi óndirýshilerdiń biri bolyp tabylady»

, - dep atap ótti vedomstvo basshysy.

Erbol Qarashókeev turaqtandyrý qorlary men «aınalym shemasy» qarajaty aıasynda Túrkistan oblysynyń sharýalaryn forvardtyq qarjylandyrý boıynsha jumysty jolǵa qoıý qajettigin atap ótti.

Bul shara otandyq óndirýshilerdi qoldaýǵa, olardy ótkizý naryqtaryna shyǵarýǵa, taýarlar tapshylyǵynyń jáne azyq-túliktiń baqylaýsyz qymbattaýynyń aldyn alýǵa múmkindik beredi.

Jalpy agroónerkásiptik keshendi qoldaýǵa aǵymdaǵy jyly 608,2 mlrd teńge bólindi. Bul qarjy ınvestıtsııalyq sýbsıdııalaýǵa, mal sharýashylyǵy men ósimdik sharýashylyǵyn damytýǵa, ǵylymı zertteýlerge, fıtosanıtarııalyq jáne veterınarııalyq qaýipsizdikti qamtamasyz etýge, aýyl halqynyń tabysyn arttyrýǵa baǵyttalady.

Memleket basshysynyń tapsyrmasy boıynsha salany memlekettik qoldaý júıesin jetildirý boıynsha jumys júrgizilip, álemdik azyq-túlik naryqtaryndaǵy jaǵdaıdy eskere otyryp, sýbsıdııalaýdyń jańa tetigin engizýdi 2023 jylǵy 1 qańtarǵa aýystyrý týraly sheshim qabyldandy.

Júıeniń basty jańalyqtarynyń biri - ony tsıfrlyq formatqa kóshirý. Fermerler úshin tegin bolatyn jáne barlyq negizgi memlekettik derekqorlarmen tolyq ıntegratsııalanatyn sýbsıdııalaýdyń biryńǵaı memlekettik aqparattyq júıesi qazirgi tańda synaqtan ótkizilip jatyr.

Buǵan deıin QR Premer-Mınıstri Álıhan Smaıylov Májilis depýtattarynyń saýalyna joldaǵan jaýabynda memleket aýyl sharýashylyǵyn sýbsıdııalaýda tehnıkalyq jáne tehnologııalyq jańarýǵa baǵyttalǵan ınvestıtsııalyq sýbsıdııalarǵa basymdyq beretinin jazǵan edi.