Fermerler Biryńǵaı aqparattyq júıe baǵarlamasymen sýbsıdııa ala almaı otyr

Sýbsıdııalaýdyń biryńǵaı memlekettik aqparattyq júıesi (SBMAJ) saldarynan fermerler sýbsıdııa alýda qıyndyqqa tap bolyp otyr. Bul týraly Májilis depýtaty Islam Suńqar aıtty, dep habarlaıdy Kazinform.

«Búgin S.Seıfýllın atyndaǵy Qazaq agrotehnıkalyq zertteý ýnıversıtetinde agrarlyq ǵylymdy damytýǵa arnalǵan dóńgelek ústel otyrysyn ótkizip jatyrmyz. Maqsatymyz agrarlyq ǵylymdaǵy jańa trendterdi anyqtap, olardy aýyl sharýashylyǵy óndirisine engizý. Prezıdentimiz Joldaýynda klımattyq jaǵdaılarǵa, sýǵa táýeldi bolmaý qajettigin, ǵylymı jetistikterge, tsıfrlandyrýǵa negizdelgen jańa sheshimder qabyldaý kerektigin aıtqan edi. Dál osy baǵytta is-sharany ótkizip otyrmyz», – dedi depýtat tilshilerge bergen suhbatynda.

Іs-shara barysynda ol agrarlyq sektorǵa tsıfrandyrýdy engizý jaıly sóz sóıledi.

«Qazirgi ýaqytta belgili bir problema oryn alýda. SBMAJ degen baǵdarlama bar. Dál osy júıe saldarynan fermerlerge memleketten sýbsıdııa men qoldaý alý óte kúrdeli bolyp tur. Jazda – qurqaqshylyq, kúzde – jańbyr syndy aýa raıy jaǵdaıymen baılanysty problemalardan bólek, fermerler sýbsıdııany da alyp úlgermedi. Óıtkeni, baǵdarlama qatyp qalyp, fermerler kóktemgi jáne kúzgi jumystardy bastaýǵa qoldaýdy der ýaqytynda ala almady. Qalaı degende de mınıstrlik baǵdarlama jetildiriletinin aıtyp otyr. Olardyń dereginshe, mamyrǵa qaraı bári retteledi. Biraq, qalaı desek te másele týyndady», – dedi Islam Suńqar.