Fermerler aldaǵy qurǵaqshylyqtan shyǵa ala ma
ASTANA. QazAqparat - Aldaǵy jylda qurǵaqshylyq bolady degen boljam bar. Sebebi bıyl jer erte qatyp, qar kesh tústi. Sonyń saldarynan jerdiń ylǵaldylyǵy tómen bolady, dep xabarlaıdy QazAqparat tilshisi.
Qazaqstan fermerleri odaǵynyń prezıdenti Áýezxan Darynovtyń aıtýynsha, ondaıda bılikten kómek suraýǵa týra keledi. "Árıne,bizde talaı qurǵaqshylyqtar boldy, talaıynan aman-esen shyqtyq. Bıyl da daıyndalamyz. Biraq "jaman aıtpaı, jaqsy joq" deıdi, eger qatty qurǵaqshylyq bolsa, úkimetke aryzdanatyn bolamyz", - dedi Á.Darynov Astanada ótken baspasóz máslıxatynda.
Degenmen, uıym basshysy qatty qurǵaqshylyqtan da óz kúshimen shyǵýǵa bolatynyn jetkizdi. Osy oraıda ol óz sharýa qojalyǵyn mysalǵa keltirdi. "Meniń óz sharýa qojalyǵym bar. Qurǵaqshylyq kezinde talaı fermerlerge saqtandyrý da, kómek de berildi. Men bolsam, bir tıyn alǵan joqpyn. "Darın" sharýa qojalyǵyn alyp kórseńizder de bolady. Aqshany nege almadym? Sebebi ýaqytynda jaqsy tuqym septim. Mine, qazir el qardy ustaı almaı jatsa, biz qardy ustap otyrmyz. Sonyń arqasynda erteń qandaı qurǵaqshylyq bolsa da, mende, kem degende, 4-5 tsentner shyǵady. Ol degeniń qaryzdan qutylamyn, sosyn kelesi jylǵa daıyndalamyn. Endi, shamaly shyǵyn bolýy múmkin. Degenmen, sondaı daıyndyqqa tyrysý qajet", - dep atap kórsetti Á.Darynov.
