Fermerge aqshany aldyn ala berý: et naryǵyna qandaı tetik qajet
ASTANA. KAZINFORM — Qazaqstanda fermerlerge ónim aqysyn aldyn ala tóleýge múmkindik beretin forvardtyq satyp alý tetigin keńinen qoldaný usynyldy. Bul týraly Qazaqtyń aqbas tuqymy respýblıkalyq palatasynyń atqarýshy dırektory, fermer Bahtııar Ótelbaev BIZDIÑ ORTA podkastynda aıtty.
Onyń aıtýynsha, bul tásil sharýalarǵa mal ósirýge qajetti qarajatty erterek alýǵa múmkindik beredi. Satyp alýshy ónimniń aqysyn aldyn ala tóleıdi, al fermer kelisilgen merzimde maldy nemese etti jetkizedi.
— Forvardtyq satyp alý kezinde aqshany aldyn ala alasyz. Sol qarajatqa jem-shóbińizdi, janarmaıyńyzdy alyp, jumysshylardyń jalaqysyn tóleısiz. Keıin kelisilgen baǵa boıynsha maldy nemese etti daıyndap beresiz. Mundaı jaǵdaıda nesıe alýdyń qajeti bolmaıdy, — dedi Bahtııar Ótelbaev.
Onyń sózinshe, fermer satyp alýshydan qarajat alyp, kelisimshartta kórsetilgen ónimdi belgilengen merzimde jetkizýge mindetteledi.
— Satyp alýshy aqshasyn aldyn ala beredi, al siz kelisimshart boıynsha mindettemeńizdi oryndaısyz. Bul óte tıimdi. Máselen, sheteldik satyp alýshy kelip, aqshasyn aldyn ala berýge daıyn bolýy múmkin, — dedi ol.
Fermer mundaı tetikti bordaqylaý alańdary men sharýashylyqtarǵa da qoldanýǵa bolatynyn aıtty. Bul rette ónimniń belgili bir bóligin ishki naryqqa belgilengen baǵamen jetkizý talabyn qarastyrýǵa bolady.
Ótelbaevtyń aıtýynsha, forvardtyq satyp alý sharýalarǵa jem-shóp, janarmaı men jalaqyǵa qajetti qarajatty ónimdi ótkizbeı turyp alýǵa múmkindik beredi.
Budan buryn qazaqtyń aqbas sıyry týraly kitap jaryqqa shyqqany belgili boldy.
