Fermerden tikeleı dastarqanǵa: Elordada úlken jármeńke ótip jatyr
ASTANA. KAZINFORM — Astanada Qaraǵandy jáne Qostanaı oblystarynyń sharýalary qatysqan aýyl sharýashylyǵy jármeńkesi ótip jatyr. Saýda sórelerine myń tonnaǵa jýyq ónim qoıylǵan, dep habarlaıdy elorda ákimdiginiń resmı saıty.
Respýblıka kúnine oraı uıymdastyrylǵan jármeńkege barǵan jurt et, kókónis, sút ónimderin, balyq jáne basqa da taýarlardy otandyq óndirýshilerden tikeleı satyp ala alady.
Eki óńirden kelgen 140-tan astam aýyl sharýashylyǵy óndirýshisi men kásiporyn óz ónimderin usyndy. Onda et, maýsymdyq kókónister, sút ónimderi, un, jarma, jumyrtqa, shujyq ónimderi, bal jáne kondıterlik ónimderin jáne t. b. alýǵa bolady.
Qaraǵandy oblysy 583 tonnadan astam ónim jetkizdi. Saýda sórelerine 310 tonna kartop, 134,7 tonna et, 80 tonna kókónis, 15 tonna sút ónimi, 7,5 tonna balyq jáne 36 tonna bakaleıa taýary qoıyldy. Budan bólek, jármeńkege 310 myń dana taýyq jumyrtqasy jetkizildi.
Qostanaı oblysy 100-den asa ataýly 400 tonnadan astam ónim jetkizdi. Onyń ishinde 49 tonna et, 31 tonna sút ónimi, 23 tonna shujyq pen etten jasalǵan jartylaı fabrıkattar, 30 tonna jarma jáne makaron ónimderi, 90 tonna kartop pen kókónis, sondaı-aq 40 tonna un bar. Sonymen qatar nan-toqash jáne kondıterlik ónimder, sýsyndar men baldy da tabýǵa bolady.
— Demalys kúnderine oraı azyq-túlik alýǵa keldim. Kartop, pııaz, sábiz, azdap sıyr eti men sút ónimderin aldym. Barlyǵyn bir jerden satyp alýǵa bolatyny yńǵaıly, baǵalary da arnaıy taqtaıshalarda kórsetilgen. Salystyryp, tańdaý jasaýǵa bolady, — deıdi jármeńkege kelgen turǵyndardyń biri.
Mundaı jármeńkeler fermerler men óńdeý kásiporyndaryna óz ónimderin elorda turǵyndaryna satýǵa, al qala turǵyndaryna elimizdiń ár óńirinen kelgen taýarlardy bir jerden satyp alýǵa múmkindik beredi.
Jármeńke 24 jáne 25 qazan kúnderi saǵat 09:00–den 18:00–ge deıin Qarqaraly tasjoly, 1 mekenjaıyndaǵy «Qazanat» ıppodromynyń aýmaǵynda ótip jatyr.
Buǵan deıin Almaty oblysynda «Dala dámi» jármeńkesinde halyqqa 365 tonnadan astam ónim usynylǵanyn jazdyq.
