Fermalarda et baǵasynyń tómendeýi mal sharýashylyǵynyń damýyna baılanysty - A. Mamytbekov
«Et baǵasyn kúrt ósti dep aıta almaımyn, kerisinshe qazirgi ýaqytta iri qara mal etiniń baǵasy fermalarda tómendegenin baıqap otyrmyz. Al saýda oryndarynda baǵanyń ósýi máselesin aýyl sharýashylyǵy salasyna qatysy joq deýge bolady. Óıtkeni, ol jerde birqatar sheshilmegen jaıttar bar, ıaǵnı básekelestiktiń tómendigi, saýda oryndarynyń jetispeýshiligi, taýar óndirýshilerdiń tikeleı saýda oryndaryna kelip saýdalaýyna múmkindiktiń bolmaýyna baılanysty fermerlerdiń baǵasy tómen túsip, qaladaǵy baǵa kerisinshe keı jerlerde ósýin baıqap otyrmyz», - dedi mınıstr.
Osy oraıda, vedomstvo basshysy bul másele et ónimderin satyp alýshylar men taýar óndirýshilerge de keri áserin tıgizip otyrǵandyǵyn atap ótti. Bul turǵyda mınıstrlik tarapynan búginde arnaıy keshendi jospar ázirlenip jatqan kórinedi.
A. Mamytbekovtiń paıymynsha, sonymen qatar fermalarda satatyn et baǵasynyń tómendeýi mal sharýashylyǵynyń damýyna baılanysty bolyp otyr. Elimizdiń ishindegi naryq aýqymdy bolmaǵanymen, et óndirý múmkindigimiz birneshe ese artyq. Sondyqtan da aýyl sharýashylyǵy ónimderin eksporttaý úshin Qazaqstanǵa ıntegratsııalyq múmkindikter qajet.
Baspasóz máslıhaty barysynda «Et ımporty ósip jatyr ma?» degen saýalǵa mınıstr bylaı jaýap qaıyrdy: «Qus eti ımportynyń tómendegenin baıqaýǵa bolady. Al basqa pozıtsııalar boıynsha ımport ósken joq», - dedi.