Fermadan tutynýshyǵa deıin: mal ónimderin ótkizý tártibi kúsheıtilmek
ASTANA. KAZINFORM — Qazaqstanda mal ónimderin fermadan bastap tutynýshyǵa deıingi aralyqta baqylaý tetikterin jetildirýge baǵyttalǵan zań qabyldanbaq. Bul týraly Quryltaıdaǵy Agrarlyq komıtettiń veterınarııa máseleleri boıynsha ózgerister men tolyqtyrýlar engizý týraly zań jobasyn talqylaýǵa arnalǵan otyrysta aıtyldy.
Depýtattardyń pikirinshe, jańa zań jobasynda tórt túlik maldy vaktsınatsııalaý, mal soıý alańdarynyń jaı-kúıin baqylaý, mal urlyǵynyń aldyn alý sharalaryn kúsheıtý joldary qarastyrylǵan. Sondaı-aq veterınar mamandardy áleýmettik turǵyda qoldaý, atap aıtqanda olardyń jalaqysyn kóterý, tıisti kıimmen ári qural-jabdyqtarmen qamtý, bilimin jetildirýge jaǵdaı jasaý jáne basqa da sharalar kózdelip otyr. Otandyq et óndirýshilerge qoldaý kórsetý syndy mańyzdy másele de nazardan tys qalmaıdy.
— Veterınarııa týraly zańǵa engiziletin ózgeristerdegi jańashyldyqtar veterınarııanyń deńgeıin joǵary halyqaralyq deńgeıge kóterýge baǵyttalǵan. Onyń aıasynda mal ónimderin esepke alýdan bastap tutynýshyǵa jetkenge deıingi aralyqta qaýipsizdikti saqtaýǵa baqylaý kúsheıtilýi tıis. Sonymen qatar, veterınar mamandarǵa áleýmettik qoldaý kórsetý, ıaǵnı jalaqylarynyń ósýi, arnaıy kıim, quraldarmen qamtamasyz etý qarastyrylǵan jáne olarǵa bilimin kóterýge, oqýǵa jaǵdaı jasalady. Sondaı-aq malǵa egiletin ekpelerdiń sapasyn joǵary deńgeıge kóterý, onyń sapasyn baqylaıtyn mamandardy óz elimizde daıarlaý kózdelgen, — dedi Quryltaı depýtaty, zań jobasy boıynsha jumys tobynyń jetekshisi Bota Eleýsizova.
Óz kezeginde QR AShM Veterınarııalyq baqylaý jáne qadaǵalaý komıteti tóraǵasynyń orynbasary Tasqyn Qyzaıbaev, zań jobasy aıasynda Qazaqstan aýmaǵynda farmatsevtıkalyq ınspektorlar degen uǵym engizilip jatqanyn aıtty.
— Bolashaqta bul zań qabyldansa, veterınarııalyq preparattardy óndirýshilerge GNP standarty boıynsha sertıfıkat bere alamyz. Sonymen qatar, óz elimizde veterınarııalyq sanıtarııalyq ınsnpektorlardyń quramyna farmatsevtıkalyq ınspektorlardyń quziretterin de kirgizetin bolamyz, — dedi vedomstvo ókili.
Buǵan deıin Respýblıkalyq veterınarııalyq zerthana qyzmetkerleriniń jalaqysy 26%-ǵa óskenin jazǵan edik.
