Ferǵanada Qyrǵyzstan, Ózbekstan jáne Tájikstannyń arnaıy qyzmetteri basshylarynyń kezdesýi ótti

ASTANA. KAZINFORM — 6 mamyrda Ferǵanada Qyrǵyz Respýblıkasy Mınıstrler kabıneti tóraǵasynyń orynbasary – Ulttyq qaýipsizdik memlekettik komıtetiniń tóraǵasy Qamchybek Tashıev, Tájikstan Ulttyq qaýipsizdik memlekettik komıtetiniń tóraǵasy Saımýmın ıAtımov jáne Ózbekstannyń Memlekettik qaýipsizdik qyzmetiniń tóraǵasy Abdýsalom Azızovtyń kezdesýi ótti, onda aımaqtyq qaýipsizdikti qamtamasyz etýdiń problemalary talqylandy.

Qyrǵyz Respýblıkasy Ulttyq qaýipsizdik komıtetiniń habarlaýynsha, kelissózder barysynda taraptar terrorızm, ekstremızm, esirtki trafıgi, zańsyz kóshi-qon, kontrabanda jáne transshekaralyq sıpattaǵy basqa da qaýipterge qarsy kúres sııaqty ózekti baǵyttar boıynsha ózara is-qımyl men onyń perspektıvalary jóninde ashyq jáne senimdi pikir almasty.

Shekara mańy yntymaqtastyǵy jáne jalpy memleketter arasyndaǵy tatý kórshilik qatynastardy damytý úshin qolaıly jaǵdaı jasaý máseleleri qozǵaldy.

Dıalog barysynda Qyrǵyzstan men Tájikstan arasyndaǵy memlekettik shekaralardy delımıtatsııalaýǵa qatysty kún tártibindegi máseleler, sondaı-aq Ózbekstan men Qyrǵyzstan arasyndaǵy shekaralardy demarkatsııalaý máseleleri de qaraldy.

«Kezdesý qatysýshylary qyrǵyz-tájik shekarasyn delımıtatsııalaý jáne ózbek-qyrǵyz memlekettik shekarasyn demarkatsııalaý jumystaryn jedeldetý týraly kelisimderge qol jetkizip, taraptardyń ózara múddelerin eskere otyryp, osy máselelerdi sheshýdiń praktıkalyq sharalaryn belgiledi», - delingen habarlamada.

Kelissózder qorytyndysy boıynsha qyrǵyz-tájik úkimetaralyq komıssııasynyń múshelerine shekaranyń qalǵan ýchaskelerin kelisý, sondaı-aq tıisti ekijaqty shartty daıyndaý jáne qol qoıý jóninde naqty tapsyrmalar berildi.