«Fenıks» fılminiń rejısserin qamaýda ustaý merzimi 1 aıǵa uzartyldy
ALMATY. QazAqparat - «Fenıks» kınokartınasyna bólingen qarajatty qoldy etip, maqsatsyz jumsady dep aıyptalyp otyrǵan fılm rejısseri Talǵat Jánibekovti qamaýda ustaý merzimi bir aıǵa, 2017 jyldyń 28 mamyryna deıin uzartyldy, dep habarlaıdy QazAqparat tilshisi sot zalynan.
«Talǵat Jánibekovtiń azamattyq qorǵaýshysy Amangeldi Jánibekov tarapynan aıyptalýshynyń qamaýda ustaý merzimi 28 sáýir kúni aıaqtalýyna baılanysty kepilge múlik qoıý arqyly nemese úıqamaqqa aýystyrý arqyly ony qamaýdan bosatý týraly ótinimhaty qanaǵattandyrylmaıdy. Sot bul ótinimdi T.Jánibekovke taǵylǵan aıyptyń asa aýyr qylmys túrine jatatyndyqtan qanaǵattandyrmady. QR QPK 319-babynyń 5-bóligine sáıkes, sot T.Jánibekovti qamaýda ustaý merzimin bir aıǵa 28 mamyr 2017 jylǵa deıin uzartý týraly qaýly shyǵardy», - dedi sýdıa Táken Shakırov.
Aıta keteıik, keshe Almatynyń mamandandyrylǵan aýdanaralyq sotynda «Fenıks» fılminiń rejısseri Talǵat Jánibekov pen fılm prodıýseri Tuńǵyshbaı Jamanqulovqa qatysty kezekti sot otyrysy ótti. Onda kompıýterlik grafıkamen jasalǵan jáne fılmdi túsirý boıynsha jasalǵan jumystardyń beınematerıaldary tanystyryldy. Sot otyrysy sońynda Tuńǵyshbaı Jamanqulov sýdıaǵa ótinim hat berip, is boıynsha ekonomıkalyq saraptama taǵaıyndaýdy surady.
Tuńǵyshbaı Jamanqulov ótinim hatynda ekonomıkalyq sarapshylar tarapynan «Fenıks» boıynsha jasalǵan jumysqa baǵa berilip, oǵan qansha qarajat jumsalǵanyn anyqtaýdy, fılm boıynsha laýazymdy, jaýapty adamdar jumsaǵan qarajattyń naqty somasy men óziniń, ıaǵnı Jamanqulov tarapynan qansha somada qarjy jumsalǵanyn anyqtap berýin surady.
«Qarjy polıtsııasy óz saraptamasyn jasaǵan. Biz jumys jasalǵanyn dáleldeý úshin ekonomıkalyq saraptama komıssııasyn qurýdy suraımyz. Ol saraptama toby QR Ádilet mınıstrligi tarapynan, óner salasyn biletin, fılmdi túsinetin mamandardy quramyna engize otyryp qurylsa deımiz. Kıno túsirý tásilin biletin adamdar bolǵany óte mańyzdy», - dedi Tuńǵyshbaı Jamanqulov.
Sýdıa Táken Shákirov búgin Jamanqulovtyń ótinimhaty boıynsha 5 mamyr kúni ótetin sot otyrysyna ekonomkalyq sarapshyny shaqyrý týraly qaýly shyǵardy.
Aıta keteıik, sotta jábirlenýshi tarap QR Mádenıet jáne sport mınıstrliginiń ókili Serik Estııarov aıyptaý aktisi boıynsha aıyptalýshylardan óndirilýi qajet materıaldyq shyǵyndardyń somasyn aıtty.
«Aıyptaý aktisi boıynsha, biz osy ýaqytqa deıin ótelgen 5 mln 314 teńgeni eseptemegende, Tuńǵyshbaı Jamanqulovtan 29 mln 869 myń teńge materıaldyq shyǵyndy óndirip alýdy suraımyz. Sondaı-aq, Talǵat Jánibekovten 6 mln 802 myń teńge, Sultan Shyntemirovten 2 mln 915 myń teńge, Danııar Ábiqadirovten 14 mln 6 myń teńge, Karabeınıkovten 3 mln 418 myń teńge óndirip berýdi suraımyz. Aıta keteıik, Korobeınıkov 400 myń teńgesin ótedi. Óz kinásin moıyndap, qarajatty qaıtaryp bergenderge talap aryz túsirilgen joq. Olar ıÝdına jáne Ábishevter men Korobeınıkov», - dedi QR Mádenıet jáne sport mınıstrliginiń ókili Serik Estııarov.
