Feldsherler ózin-ózi qorǵaý buıymdarymen qamtylady – DSM

ASTANA. KAZINFORM – Densaýlyq saqtaý mınıstrligi jedel járdem qyzmetkerlerin qosymsha ózin-ózi qorǵaý buıymdarymen qamtamasyz etý boıynsha shara qabyldaýdy oılastyryp otyr.

Búgin Májiliste jumysshylardyń quqyqtaryn qorǵaýǵa arnalǵan zań jobasy birinshi oqylymda talqylanyp jatyr.

– Jaqynda toǵyz qabatty úıdiń qasbeti qulap, feldsher Uldana Myrzýan TJ qyzmetkerlerin kútpesten úıindi astynda kómek surap jatqandarǵa kómekke umtyldy. Óziniń basyna kondıtsıoner qulap, keshe ǵana turmysqa shyqqan qyz esin jımastan kóz jumdy. Osyndaı jaǵdaı bolǵanda jańa zań jobasynda óndiristik jaraqattan qorǵaýdyń qandaı tetikteri jazylǵan?, – dep suraq qoıdy Májilis depýtaty Nartaı Sársenǵalıev.

Oǵan Densaýlyq saqtaý birinshi vıtse-mınıstri Tımýr Sultanǵazıev jaýap berdi jáne mundaı jaǵdaılardy boldyrmaý úshin qazir eńbek zańnamasynda qorǵaý tetikteri men reglamentter jazylǵanyn aıtty.

– Feldsher tótenshe jaǵdaı qyzmetkerlerinen buryn kelip, óz paryzyn atqarý jaǵdaıynda mert boldy. Endi ózin-ózi qorǵaý úshin qazir Densaýlyq saqtaý mınıstrligi feldsherlerdi, jedel járdem qyzmetkerlerin qosymsha ózin-ózi qorǵaý buıymdarymen qamtamasyz etý boıynsha shara qabyldaýdy oılastyryp jatyr, – dep jaýap berdi mınıstrlik ókili.

Aıta keteıik, elimizde jedel járdem felsherlerine qol kóterý, oq atý, balaǵattaý jaǵdaılary jıilep ketti.

Prezıdent te medıtsına qyzmetkerlerine kúsh kórsetkeni úshin jazany kúsheıtýdi tapsyrdy.

Endi medıtsına mamandaryn dóreki naýqastardan qorǵaıtyn vıdeojetondar ázirlenip jatyr.

Keshe Memleket basshysy Qasym-Jomart Toqaev qyzmettik boryshyn úlgili atqarǵany, qıyn-qystaý jaǵdaıda kórsetken erligi men janqııarlyǵy úshin Astana qalalyq jedel medıtsınalyq járdem stantsııasynyń feldsheri Uldana Myrzýandy «Erligi úshin» medalimen marapattady.