Feldsher Uldana Myrzýannyń ólimine qatysty is sotqa joldandy
ASTANA. KAZINFORM — Byltyr kúzde elordadaǵy turǵyn úıde kirpish qaptamasynyń qulaýy saldarynan mert bolǵan Uldana Myrzýanǵa qatysty isti sotqa deıingi tergeý aıaqtaldy. Bul týraly Astana qalasynyń Polıtsııa departamenti málim etti.
— Uldana Myrzýannyń ólimine qatysty sotqa deıingi tergeý aıaqtalyp, qylmystyq is sotqa joldandy, - delingen Polıtsııa departamentiniń Kazinform agenttigine bergen jaýabynda.
Sonymen qatar Astana sotynyń baspasóz qyzmeti sot otyrysynyń ótetin kúni áli belgilenbegenin habarlady.
Esterińizge sala ketsek, 8 qarashada elordada turǵyn úı kesheniniń qasbetindegi kirpish qaptamasy men kondıtsıoner qondyrǵysynyń bóligi qulap, saldarynan 5 adam zardap shekti. Zardap shekkenderdiń bári № 1 kópsalaly aýrýhanaǵa jetkizildi.
18 qarasha kúni jaraqat alǵan feldsher Uldana Myrzýan kóz jumdy.
Bul rette eki qylmystyq is qozǵaldy. Birinshisi — sapasyz qurylys, al ekinshisi — qaýipsizdik talaptaryna saı kelmeıtin qyzmetterdi kórsetý.
Memleket basshysynyń Jarlyǵymen qyzmettik boryshyn úlgili atqarǵany, qıyn-qystaý jaǵdaıda kórsetken erligi men janqııarlyǵy úshin Astana qalalyq jedel medıtsınalyq járdem stantsııasynyń feldsheri Uldana Qaldarhanqyzy Myrzýan (marqum) «Erligi úshin» medalimen marapattaldy.
