Feldsher Uldana Myrzýannyń kúıeýi jábirlenýshi mártebesinen bas tartpaıtynyn aıtty
ASTANA. KAZINFORM – 2025 jylǵy qarashada qyzmettik mindetin atqarý kezinde qaza tapqan feldsher Uldana Myrzýannyń kúıeýi onyń ólimine qatysty qylmystyq is boıynsha jábirlenýshi mártebesinen bas tartpaıtynyn málimdedi.
Youtube jelisindegi suhbatynda Ádilet Zeınel bul protsessýaldyq mártebeni saqtap qalý sheshiminiń sebebin túsindirdi.
– Bul isti ózim bastaǵan soń, ony sońyna deıin jetkizgim keledi. Barlyq satydan óttim, protseste ózim bastamashy boldym jáne ony aıaqtaýǵa nıettimin. Qazaqta «er jigit bastaǵan isin aıaqtaıdy» degen sóz bar. Eger erteń bul isten bas tartsam, «ekinshi otbasyn qurdy da, bárinen bas tartty» deıtinder tabylady. Bul taǵy da teris pikirlerdiń órshýine ákeledi. Biraq men ózgeniń sózinen qoryqqandyqtan emes, Uldananyń aldyndaǵy jáne barsha jurt aldyndaǵy ishki jaýapkershilikti sezingendikten jalǵastyryp otyrmyn, – dedi ol.
Buǵan deıin Uldana Myrzýannyń qazasyna qatysty sotqa deıingi tergeý aıaqtalyp, is sotqa joldanǵany habarlanǵan bolatyn. Alǵashqy sot otyrysynyń kúni ázirge belgilengen joq.
Eske salaıyq, jedel járdem feldsheri 23 jasar Uldana Myrzýan 2025 jylǵy 18 qarashada qyzmettik mindetin atqarý kezinde kóz jumdy.
8 qarashada elordada turǵyn úı kesheniniń qasbetindegi kirpish qaptamasy men kondıtsıoner qondyrǵysynyń bóligi qulap, saldarynan 5 adam zardap shekti. Zardap shekkenderdiń bári № 1 kópsalaly aýrýhanaǵa jetkizildi.
Memleket basshysy qaza tapqan feldsherdi «Erligi úshin» medalimen marapattady.
