Feldsher Uldana Myrzýannyń qazasyna qatysty sot protsesi tikeleı efırde kórsetiledi
ASTANA. KAZINFORM – Búgin, 18 tamyzda qyzmettik mindetin atqarý kezinde qaza tapqan feldsher Uldana Myrzýannyń ólimine qatysty sot protsesi bastaldy, dep habarlaıdy Joǵarǵy sot.
Sot otyrysy saǵat 15:00-de bastalǵan.
Іske qoǵam tarapynan joǵary qyzyǵýshylyq tanytylyp otyrǵanyn, sot protsesine qatysýshylardyń pikirin, sondaı-aq jábirlenýshi taraptyń ótinishin eskere otyryp, sot osy is boıynsha ashyq sot otyrystaryn onlaın kórsetý týraly sheshim qabyldady.
– Sot protsesiniń onlaın-translıatsııasyn Joǵarǵy sottyń YouTube arnasynan kórýge bolady, – delingen habarlamada.
Sondaı-aq Joǵarǵy sottyń Telegram-arnasyna jazylyp, sottyń áleýmettik jelilerdegi resmı paraqshalarynan jańartylǵan aqparatty baqylaýǵa bolady.
QR Joǵarǵy soty respýblıka sottaryndaǵy sot otyrystaryn tikeleı efırde kórsetý tájirıbesin jalǵastyryp jatqanyn atap ótti.
