Feldsher Uldana Myrzýan ólimine qatysty alǵashqy sot otyrysy bastaldy
ASTANA. KAZINFORM — Byltyr kúzde elordadaǵy turǵyn úıde kirpish qaptamasy qulap, mert bolǵan Uldana Myrzýanǵa qatysty is sotta qaralyp jatyr. Jábirlenýshi taraptyń advokaty Nursultan Orynbekovtiń aıtýynsha, Páter ıeleri kooperatıviniń tóraǵasy aıyptalýshy retinde jaýapqa tartylyp otyr.
Atalǵan is boıynsha barlyǵy alty jábirlenýshi bar. Olardyń qatarynda Uldana Myrzýannyń anasy, sondaı-aq osy iske baılanysty zardap shekken ózge de jábirlenýshiler bar.
— Tergeý aıasynda barlyq mán-jaı belgili boldy. Zańnamada mundaı áreketter úshin naqty jaýapkershilik qarastyrylǵan. Osyǵan baılanysty biz tergeý organdarynyń ustanymymen kelisemiz. Al ári qaraı bul máseleniń taǵdyryn sot sheshedi. Bul jerde sebep-saldarlyq baılanys bar. Qazir bul týraly tolyq aqparatty jarııalaı almaımyz. Barlyǵy sotta anyq bolady, — dedi qorǵaýshy sot kýlýarynda tilshilerge bergen suhbatynda.
Onyń aıtýynsha, kondıtsıonerge, úıdiń qasbetine qatysty birqatar saraptama júrgizilip, adam ólimine naqty ne sebep bolǵany anyqtaldy.
— Osyǵan baılanysty tergeý barysynda barlyq jaǵdaı dáleldendi dep esepteımiz. Al kinálilerdiń jaýapkershiligi sotta anyqtalady. Ázirge azamattyq talap-aryz bergen joqpyz. Buǵan deıin de aıtqanymyzdaı, sottalýshylar osy ýaqytqa deıin advokattary da, ózderi de keshirim suraý nemese qandaı da bir kezdesý úshin bizge habarlasqan joq. Sondyqtan ázirge biz ashyqpyz, — deıdi advokat.
Eske salaıyq, jedel járdem feldsheri 23 jasar Uldana Myrzýan 2025 jylǵy 18 qarashada qyzmettik mindetin atqarý kezinde kóz jumdy.
8 qarashada elordada turǵyn úı kesheniniń qasbetindegi kirpish qaptamasy men kondıtsıoner qondyrǵysynyń bóligi qulap, saldarynan 5 adam zardap shekti. Zardap shekkenderdiń bári № 1 kópsalaly aýrýhanaǵa jetkizildi.
Memleket basshysy qaza tapqan feldsherdi «Erligi úshin» medalimen marapattady.
Keıinirek Uldana Myrzýannyń kúıeýi Ádilet Zeınel qylmystyq is boıynsha jábirlenýshi mártebesinen bas tartpaıtynyn málimdedi.
