Feldsher Uldana Myrzýan qazasy: TJD ókili sotta jaýap berdi
ASTANA. KAZINFORM – Jedel járdem feldsheri Uldana Myrzýannyń qazasyna qatysty sot otyrysynda Astana qalasy Tótenshe jaǵdaılar departamenti kezekshi bóliminiń bastyǵy Rızabek Daıyrov jaýap berdi. Ol ǵımarat qasbeti qulaǵan soń qutqarýshylardyń qalaı áreket etkenin aıtyp berdi jáne shuǵyl qyzmetterdiń ózara is-qımyl tártibin baıandady.
Kýágerdiń aıtýynsha, oqıǵa týraly habar TJD-ǵa jedel járdem qyzmetkerlerinen túsken. Oqıǵa ornyna órt sóndirýshiler, jedel-qutqarý jasaǵy jáne avtokótergish jiberilgen.
R.Daıyrov jedel járdem qyzmetkerleri oqıǵa ornyna qutqarýshylardan buryn barǵanyn atap ótti. Onyń sózinshe, eger TJD qyzmetkerleri oqıǵa ornyna birinshi bolyp jetkende, qaýipti aýmaqty qorshap, qaýipsizdik rastalǵansha basqa qyzmetterdiń kirýine jol bermeıtin edi.
– Eger bizdiń qyzmetkerler birinshi bolyp kelgende, eshkimdi kirgizbes edik: jaıaý júrginshilerdi de, polıtsııany da, jedel járdemdi de. Qaýipsizdik rastalǵanǵa deıin tek TJD qyzmetkerleri jumys isteıtin edi, – dedi kýáger.
Qutqarýshylar kelgen soń aýmaqty tekserip, úıindi astynan eki adamdy tapqan. Olardy qaýipsiz jerge shyǵaryp, qabyrǵanyń odan ári opyrylyp ketýine jol bermeý úshin qaýipti qurylymdardy bólshekteýge kirisken.
Sondaı-aq R.Daıyrov TJD-nyń basqa jedel qyzmettermen ózara is-qımyly Іshki ister mınıstriniń №445 buıryǵymen jáne arnaıy ózara is-qımyl algorıtmimen retteletinin aıtty.
Buǵan deıin feldsher Uldana Myrzýannyń áriptesi Dilnaz Baızaqova kýáger retinde jaýap berdi.
Taǵy bir jábirlenýshi alǵan aýyr jaraqatyn aıtyp, ótemaqy talap etti.
