Feldsher ólimi: Úıdi salǵan qurylysshylar da sotta jaýap berýi múmkin
ASTANA. KAZINFORM – Astanada feldsher Uldana Myrzýannyń qaza bolýyna qatysty kezekti sot otyrysy bastaldy. Onda jábirlenýshiler MIB tóraǵasy Sáýle Jubanııazovaǵa qatysty qylmystyq iske qurylys kompanııasy men basqa da tulǵalarǵa qatysty isti biriktirýdi surady.
Buǵan Astana qalasynyń mamandandyrylǵan aýdanaralyq tergeý sotynyń 2026 jylǵy 1 qazandaǵy qaýlysy negiz boldy. Onda úıdiń qurylysyna qatysy bar tulǵalarǵa qatysty qylmystyq isti toqtatý týraly buǵan deıin qabyldanǵan sheshimniń kúshi joıylǵan.
Sotta jábirlenýshi, Uldana Myrzýannyń anasy Sálıma Omarovanyń ókili MIB tóraǵasy Sáýle Jubanııazovaǵa qatysty qylmystyq isti qurylys salýshyǵa jáne basqa da tulǵalarǵa qatysty ispen biriktirý týraly ótinishhat berdi.
Ókildiń aıtýynsha, isterdiń bólek qaralýy oqıǵany tolyq zertteýge kedergi keltirip, bir aıǵaqqa ártúrli baǵa berilýi múmkin. Al isterdi birge qaraý oqıǵanyń mán-jaıyn tolyq anyqtap, oǵan qatysy bar barlyq adamnyń áreketine quqyqtyq baǵa berýge kómektespek.
– Biz úshin, naqtyraq aıtqanda, jábirlenýshi Sálıma Omarova úshin shyndyqtyń anyqtalǵany mańyzdy. Bireýdi kinálaý nemese kináli adamdy jaýapqa tartý máselesinde qatelespeý kerek dep sanaımyz. Sondyqtan sottan osy isterdi biriktirip qaraýdy suraımyz, – dedi ókil Nursultan Orynbekov.
Sonymen birge, zańger isti ári qaraı protsessýaldyq sheshim qabyldaý úshin prokýrorǵa joldaýdy surady.
Al qorǵaý tarapy isterdi biriktirýge qarsylyq bildirdi. Advokat mundaı biriktirý mindetti talap emestigin jáne tergeý sotynyń qaýlysy áli zańdy kúshine enbegenin alǵa tartty.
Onyń aıtýynsha, usynylǵan qujat S. Jubanııazovaǵa qatysty isti qaraýǵa negiz bar ekenin kórsetedi. Sondyqtan sot bul is boıynsha túpkilikti sheshim qabyldaýy kerek.
Memlekettik aıyptaýshy da ótinishhatty qanaǵattandyrýǵa qarsylyq bildirdi. Prokýrordyń aıtýynsha, 1 qazandaǵy tergeý sotynyń qaýlysy áli zańdy kúshine engen joq, al qurylys salýshyǵa qatysty qylmystyq is sotqa deıingi tergep-tekserý organyna áli joldanbaǵan.
Sondaı-aq aıyptaý tarapy Qylmystyq-protsestik kodekstiń qylmystyq isterdi biriktirý negizderin aıqyndaıtyn 43-babyna silteme jasady. Prokýror bul bapta kórsetilgen talaptar qaralyp otyrǵan iske qatysty emes dep sanaıdy. Osyǵan baılanysty ol ótinishhatty qanaǵattandyrýdan bas tartyp, is boıynsha túpkilikti sheshim qabyldaýdy surady.
Nátıjesinde Astana qalasynyń qylmystyq ister jónindegi aýdanaralyq sotynyń sýdıasy Merýert Abaeva MIB tóraǵasy Sáýle Jubanııazovaǵa qatysty qylmystyq isti qurylys salýshyǵa jáne basqa da tulǵalarǵa qatysty qylmystyq ispen biriktirý múmkindigin qaraý úshin prokýrorǵa joldaý týraly sheshim shyǵardy.
Sýdıa sheshim qabyldaý kezinde qurylys-tehnıkalyq saraptamanyń qorytyndysyn da eskergenin aıtty. Saraptama qorytyndysyna sáıkes, ǵımarattyń opyrylýyna konstrýktsııalyq aqaýlar men qurylys tehnologııasynyń saqtalmaýy sııaqty birneshe faktordyń jıyntyǵy sebep bolýy múmkin.
– Bul isti tek MIB tóraǵasy Sáýle Jubanııazovanyń áreketine baǵa berýmen shekteýge bolmaıdy. Qurylys-tehnıkalyq saraptamanyń qorytyndysynda ǵımarattyń opyrylýyna birneshe sebep áser etýi múmkin ekeni, onyń ishinde konstrýktsııalyq kemshilikter men qurylys tehnologııasynyń buzylǵany kórsetilgen. Sondyqtan apatqa ákelýi múmkin jaǵdaıǵa qatysy bar barlyq tulǵanyń áreketine tıisti quqyqtyq baǵa berilýi kerek, – dedi sýdıa M. Abaeva.
Degenmen sýdıa bul qaýly S. Jubanııazovanyń nemese basqa tulǵalardyń kinási anyqtalǵanyn bildirmeıtinin atap ótti.
– Bul qaýlymen S. Jubanııazovanyń nemese basqa tulǵalardyń kináliligi týraly másele sheshilgen joq. Іs óndiristerdi biriktirý jáne qaıǵyly oqıǵanyń barlyq mán-jaıyn tolyq tergeý máselesin sheshý úshin prokýrorǵa joldandy, – dep túsindirdi sýdıa.
Sáýle Jubanııazovaǵa qatysty eldi mekennen shyqpaý týraly bultartpaý sharasy ózgerissiz qaldy.
Sot qaýlysy jarııalanǵan kúnnen bastap 15 táýlik ishinde Astana qalasynyń qylmystyq ister jónindegi aýdanaralyq soty arqyly shaǵym berýge nemese prokýror tarapynan ótinishhat engizýge bolady.
Ótken sot otyrystarynda jábirlenýshiler MIB tóraǵasynan 35 mıllıon teńge talap etken edi.
