Feldsher qazasy: Toǵyz qabatty úıge bes qabattyq konstrýktsııa qoldanylǵan
ASTANA. KAZINFORM — Astanada jedel járdem feldsheri Uldana Myrzýannyń qazasyna qatysty sot otyrysy jalǵasyp jatyr. Búgin qorǵaý taraby qurylys salasynyń mamany Veronıka Lobaevany arnaıy shaqyrdy jáne turǵyn úıdiń qasbeti ne sebepti qulaǵanyn surady.
V. Lobaeva sottyń qurylys-tehnıkalyq saraptamasyna pikir bildirdi jáne syrtqy qabyrǵalardyń kirpish qalaý jumystary jobalyq, tıptik jáne normatıvtik talaptarǵa sáıkes kelmegenin málimdedi.
Atap aıtqanda, onyń aıtýynsha, jobada qarastyrylǵan D69 túıini bıiktigi bes qabatqa deıingi ǵımarattarǵa arnalǵan. Al qasbeti qulaǵan turǵyn úıdiń bıiktigi — toǵyz qabat jáne taǵy tehnıkalyq qabaty bar.
— Bul D69 túıini tek bes qabatqa deıingi ǵımarattarǵa qoldanylady. Ony toǵyz qabatty úıge paıdalanýǵa bolmaıdy. Sebebi bul tıptik serııada eshqandaı kúsheıtý qarastyrylmaǵan, armatýralyq beldeýler de, qosymsha túsiretin beldeýler de joq, — dep túsindirdi maman.
Maman bul jaǵdaıdyń sot qurylys-tehnıkalyq saraptamasynyń zertteý bóliminde de kórsetilgenin atap ótti. Alaıda qorytyndy bólimde basqa qurylys aqaýlaryna — ankerleý men armatýralyq beldeýlerdiń bolmaýyna, sondaı-aq qalaý eritindisiniń tómen markasyna basa mán berilgen.
— Menińshe, sarapshylar ǵımarat qabatynyń sáıkessizdigine tıisti deńgeıde nazar aýdarmaǵan. Qurylysshylar tek bes qabatqa deıingi ǵımaratqa arnalǵan kirpish qalaý konstrýktsııasynyń tıptik serııasyn qoldanǵan. Mundaı bıiktikte qaptamanyń ornyqtylyǵyn qamtamasyz etetin ınjenerlik esepteýler men konstrýktıvtik kúsheıtý jumystary júrgizilmegen, — dedi Veronıka Lobaeva.
Onyń pikirinshe, atalǵan faktorlardyń jıyntyǵy keıinnen konstrýktsııanyń buzylýyna alyp kelgen. Qurylys mamany ǵımarattyń naqty qabat sanyna sáıkes kelmeıtin jobalyq sheshimniń qoldanylýyn basty sebep dep atady.
— Munyń bári keshendi túrde sheshýshi ról atqardy. Biraq bastapqy sebep — jobalyq sáıkessizdik. Qajetti eseptik parametrlersiz ǵımarattyń bıiktigi eki ese ulǵaıtylǵan, — dedi maman.
Buǵan deıin jedel járdem feldsheri Uldana Myrzýannyń neden qaıtys bolǵanyn aıqyndaıtyn sot-medıtsınalyq saraptama qorytyndysyn jarııalady.
Sondaı-aq elordalyq Turǵyn úı jáne turǵyn úı ınspektsııasy qasbeti qulaǵan úıdiń apatty jaǵdaıy týraly ótinish túspegenin aıtty.
