Feldsher qazasy: Sot jańa advokattyń ótinishin qanaǵattandyrmady
ASTANA. KAZINFORM – Astanada feldsher Uldana Myrzýannyń qazasyna qatysty sot otyrysynda sýdıa is boıynsha qorǵaý tarapynyń birqatar ótinishin qarady. Іske jańadan kirisken advokat Ashat Álimovtyń qylmystyq is materıaldarymen tanysýǵa qosymsha ýaqyt berý týraly ótinishi qanaǵattandyrylmady.
Sýdıanyń túsindirýinshe, sottalýshynyń alǵashqy sot otyrysynan beri qorǵaýshysy bar. Ol buǵan deıin is materıaldarymen tanysýǵa ýaqyt berý týraly ótinish bildirgen. Osyǵan baılanysty sot otyrysy keıinge qaldyrylyp, qorǵaý tarabyna is materıaldarymen tanysýǵa jetkilikti ýaqyt berilgen.
– Sot isti qaraýdyń osy kezeńinde ótinishti qanaǵattandyrýsyz qaldyrýdy uıǵardy. Sebebi sottalýshynyń alǵashqy sot otyrysynan beri qorǵaýshysy bar. Ol qylmystyq is materıaldarymen tanysý úshin ýaqyt berýdi surady. Osyǵan baılanysty onyń ótinishi negizinde sot otyrysy basqa kúnge aýystyrylyp, qylmystyq is materıaldarymen tanysýǵa jetkilikti ýaqyt berildi, – dedi sýdıa Merýert Abaeva.
Sonymen birge, sýdıa iske jańadan kirisken qorǵaýshy, advokat A. Álimovke sot otyrystary arasynda qylmystyq is materıaldarynyń barlyǵymen óz betinshe tanysýǵa quqyly ekenin túsindirdi.
Sondaı-aq sot jábirlenýshi Aınur Nurpeıisovany birinshi kezekte jaýap alý týraly máseleni ázirge qaraǵan joq. Sýdıanyń aıtýynsha, bul ótinish dáleldemelerdi zertteý tártibi belgilengennen keıin qaralady.
Sarapshyny sot otyrysyna shaqyryp, jaýap alý máselesi de ashyq qaldy. Sot bul ótinishti merziminen buryn berilgen dep tanydy, sebebi qylmystyq is materıaldary áli zerttelmegen.
– Sarapshydan jaýap alý qajettigi týraly másele qylmystyq is materıaldary zerttelgennen keıin sheshiledi, – dedi Merýert Abaeva.
Eske sala ketsek, feldsher Uldana Myrzýan ólimine qatysty alǵashqy sot otyrysy 18 tamyzda bastalǵan edi.
Іs boıynsha prokýrorlar resmı aıyptaý aktisin jarııalady.
Buǵan deıin sottalýshy Sáýle Jubanııazovanyń jańa qorǵaýshysy Ashat Álimov sot otyrysy ótetin kúni iske kiriskenin aıtyp, qylmystyq is materıaldarymen tanysýǵa jáne qorǵaý ustanymyn ázirleýge ýaqyt berýdi suraǵan edi.
