Feldsher qazasy: Ónerkásip mınıstrligi PIK mindetterin túsindirdi
ASTANA. KAZINFORM — Astana sotynda Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń mamany, Turǵyn úı qoryn damytý basqarmasynyń basshysy Qyzǵaldaq Medetova jaýap berdi. Ol zańnamada PIK tóraǵasyna qandaı mindetter júktelgenin, úıdiń ortaq múlkin tekserý qalaı júrgizilýi keregin jáne aqaýlar anyqtalǵan jaǵdaıda qandaı sharalar qabyldanatynyn túsindirdi.
Úı qasbeti — ortaq múlik
Mamannyń aıtýynsha, kóppáterli turǵyn úıdi basqarý jáne kútip ustaý máseleleri «Turǵyn úı qatynastary týraly» zań jáne birqatar normatıvtik quqyqtyq aktiler kómegimen retteledi. Atap aıtqanda, PIK tóraǵasy menshik ıeleriniń qaýipsiz ári jaıly turýyna jaǵdaı jasaýǵa baǵyttalǵan sharalardy júrgizýge mindetti.
— Kóppáterli úıdiń qasbeti de kondomınıým nysanynyń ortaq múlkine jatady. Ol úıdi tekserý kezinde qoldanylatyn túgendeý tizimine engiziledi. Onyń tehnıkalyq tekserý júrgizýge mindetti ekenin naqty kórsetetin talap joq, — dep túsindirdi Qyzǵaldaq Medetova.
Aqaý anyqtalsa, ne isteý kerek?
Mınıstrlik mamany PIK tóraǵasynyń arnaıy tehnıkalyq bilimi bolýy mindetti emes ekenin atap ótti. Alaıda mundaı bilimniń bolmaýy tóraǵany ortaq múlikti tıisti deńgeıde kútip ustaýdy uıymdastyrý jáne anyqtalǵan kemshilikterge shara qoldaný mindetinen bosatpaıdy.
Aqaý anyqtalǵan jaǵdaıda PIK tóraǵasy úı keńesimen birlesip, máseleni menshik ıeleriniń qaraýyna shyǵarýy kerek. Jaǵdaıǵa qaraı turǵyndar qarajat bólý, jóndeý jumystaryn júrgizý nemese tehnıkalyq tekserý taǵaıyndaý týraly sheshim qabyldaı alady.
Bul rette menshik ıeleri osyndaı sheshim qabyldaǵan jaǵdaıda, PIK tóraǵasy nemese úı keńesi nysandy tekserý úshin mamandardy ne uıymdardy tartýǵa bastama kótere alady.
Úıdi tekserý jáne qujattardy tapsyrý
Qyzǵaldyq Medetovanyń aıtýynsha, ortaq múlikti tekserý kondomınıým nysanyn basqarý qaǵıdalaryna sáıkes júrgiziledi. Onyń qorytyndysy boıynsha túgendeý tizimi men tekserý aktisi jasalady. Bul qujattar jyldyq shyǵystar smetasyn qurýda da paıdalanylady.
Maman PIK tóraǵasy aýysqan kezde isterdi qabyldap alý tártibine de toqtaldy. Jańa basshy úıge qatysty tehnıkalyq jáne qarjylyq qujattardy, jınalys hattamalaryn, shottar men sharttar týraly málimetterdi jáne basqa da materıaldardy qabyldap alýǵa tıis.
Onyń aıtýynsha, qujattardy tapsyrý zańnamada belgilengen merzimde qabyldaý-tapsyrý aktisi arqyly júzege asyrylýy kerek.
— Qalaı bolǵanda da, úıdi basqarý men kútip ustaý úshin eń aldymen qandaı da bir bastapqy qujattar bolýy qajet. Eń bolmaǵanda, olarmen tanysý úshin kerek, — dedi ol.
Onyń aıtýynsha, menshik ıeleriniń jınaq qarajaty esebinen memlekettik organdardy tartpaı-aq, jalpy jınalystyń sheshimimen kúrdeli jóndeý júrgizýge bolady. Al jergilikti nemese respýblıkalyq bıýdjet qarajaty paıdalanylǵan jaǵdaıda memlekettik organdardyń qatysýymen bólek tártip qoldanylady.
Buǵan deıin úı turǵyndary sotta jaýap berip, PIK tóraǵasynyń qalaı jumys istegenin aıtyp bergen edi.
2026 jylǵy 26 aqpandaǵy qorytyndyda úı apat aldyndaǵy jaǵdaıda dep tanylyp, oǵan tórtinshi dáreje berilgen.
