Fedor Emelıanenko men aty ańyzǵa aınalǵan boksshy Djordj Forman Qazaqstanǵa kelýi múmkin
ASTANA. 17 mamyr. QazAqparat - Shildede elordada ótetin erejesiz jekpe-jekten Prezıdent kýbogy úshin saıysqa elimizdiń myqty sportshylary qatysady ári tanymal sheteldik sportshylar qonaq bolady.
Bul týraly Vesti.kz portalyna Alash Pride klýbynyń dırektory Ashat Erbolatov málim etken.
«Aǵymdaǵy jyly biz Prezıdent kýbogyn «Saryarqa» velotregi alańynda ótkizýdi josparlap otyrmyz. Oǵan elimizdiń úzdik sportshylaryn shyǵaramyz. Qazirgi ýaqytta olarǵa laıyqty tanymal qarsylastar irikteýdemiz. Sonymen qatar Fedor Emelıanenkonyń jáne ataqty sportshy, aty ańyzǵa aınalǵan boksshy Djordj Formannyń ókilderimen kelissózder júrgizýdemiz. Olardy qurmetti qonaq retinde shaqyrǵymyz keledi», - dedi ol.
Bastapqyda bul týrnır mamyr aıynyń sońynda ótkizilýi tıis edi. Keıinnen onyń merzimi shilde aıyna aýystyryldy. Uıymdastyrýshylar mundaı qadamǵa jankúıerlerdiń ótinishi boıynsha baryp otyr.
