Federatsııanyń quramy tolyqtaı ózgerdi – Taekvondo federatsııasynyń prezıdenti
ASTANA. KAZINFORM – Qazaqstan WT Taekvondo federatsııasynyń prezıdenti Qudyret Shámıv ulttyq quramanyń Almaty oblysyndaǵy birlesken oqý-jattyǵý jıynyna qatysyp, aldaǵy iri jarystar qarsańynda sportshylarǵa sáttilik tiledi.
Ulttyq qurama sportshylary «Aqbulaq» olımpıadalyq ortalyǵynda Qytaıdyń Sıntszıan aımaǵyndaǵy komandasymen birge jattyǵyp jatyr. Birlesken jattyǵý jıynyna Qazaqstannan 70-ke jýyq, Qytaı tarapynan 15 sportshy qatysýda. Qurama sapyna el úzdikteri Batyrhan Tóleýǵalı, Samırhon Ababakırov, Rıta Bakısheva, Marına Sevostıanova bastaǵan taekvondoshylar tegis jınalǵan. Al, kórshi el quramasynda taekvondodan Grand Slam básekesiniń jeńimpazdary men fınalısteri bar.
Federatsııa prezıdenti Qudyret Shámıevtiń aıtýynsha, uıymnyń da, komandanyń aldynda da úlken mindetter tur.
— Birinshiden, federatsııanyń quramy tolyqtaı ózgerdi. Bapkerlerdiń de, tóreshilerdiń de quramy aýysty. Qazir jańa komanadamen alǵa basyp jatyrmyz. Aldymyzda úlken jumys tur, alar asýymyz, baǵyndyrar belesterimiz bar. Bul — tek bastamasy. Bir jolǵa qoıyp alsaq, ári qaraı dóńgeletip áketemiz. Dál qazirgi sátte komanda Bolgarııadaǵy halyqaralyq týrnırge daıyndalyp jatyr.
Biz aldaǵy azǵantaı ýaqytqa emes, uzaq jylǵa jospar quryp otyrmyz. Strategııany daıyndaǵanda aldaǵy 20 jyldy qamtydyq. Kelesi tórt jyl 2028 jylǵy olımpıadaǵa daıyndyq bolsa, odan keıingi oıyndarǵa jastardy jetildirýdi maqsat ettik. Ol kezde biz basshylyqta bolamyz ba, bolmaımyz ba, belgisiz. Dese de, bizden keıin keletin adamǵa naqty bir júıeni qaldyryp ketý oıymyzda. Osy qalyptasqan júıede naqty daıyndyq tásilderi, bapkerlerdiń arnaıy strategııasy men josparlary, tóreshilerdiń ádildigin qamtamasyz etetin talaptar men usynystardy qaǵazǵa túsirip qoıdyq, - deıdi federatsııa basshysy.
Sondaı-aq Qudyret Ignatuly komandadaǵy jańa bapkerler quramynyń jumysyna qatysty pikirin aıtty.
— Jattyǵý jıynynda sportshylar ózara tájirıbe almasýda. Bas bapker Esbol Sultanov ta óziniń qolastyndaǵy jattyqtyrýshylar quramyn tolyq ózgertip, barshaǵa jańa baǵyt-baǵdar berip, erekshe qarqynmen kirisip jatyr. Esbol Sultanov bastaǵan mamandardan salmaqty nátıje kútemiz. Qyzdar komandasynda Irannan kelgen Fatıma hanym bar. Federatsııa retinde sportshylarǵa jaǵdaı jasaý — bizge mindet. Massajshy, dáriger, psıholog bolsyn, bárimen jumys istelip jatyr. Búkil nárseni qamtyp, odan da úlken dárejege kóterýge tyrysamyz. Sheteldik mamandardy shaqyrýǵa, olarmen keńes qurýǵa, tájirıbe almasýǵa nıettimiz. Ázirge olarmen kelisim júrgizilýde, - dedi Shámıev.
Jıyn barysynda Qazaqstan WT taekvondo federatsııasynyń prezıdenti Qudyret Shámıev komanda múshelerine aldaǵy jarystarda sáttilik tilep, uıym tarapynan sportshylarǵa barlyq jaǵdaı jasalatynyn aıtty.
Aıta ketelik, qazirgi tańda Qazaqstan quramasy Bolgarııada ótetin jıynǵa daıyndalýda. Jattyǵý jıyny 25 aqpanǵa deıin jalǵasady.