Federaldy tergeý bıýrosy AQSh-ta óltirilgen qazaqstandyq azamattyń isin tergeýge múddelilik tanytty
ASTANA. 14 qarasha. QazAqparat - Federaldy tergeý bıýrosy Amerıkada adam qolynan qaza tapqan Kırıll Denıakınniń ólimine qatysty qylmystyq is qozǵaý múmkindigin qarastyrýda.
Osyǵan baılanysty federaldy sýdıa Portsmýt polıtsııa departamentinen osy qylmysty tergeýge qatysty barlyq qujattardy suratty.
Bul týraly búgin «Ekspress K» gazeti jazady. Maqala avtory Tımýr Taranchıev.
Esterińizge sala keteıik, qaraǵandylyq Kırıll Denıakın osy jyldyń 23 sáýirinde óltirilgen. Shaqyrý boıynsha kelgen polıtsııa qyzmetkerleri jas jigitti buıryqqa qulaq aspady dep atyp tastaǵan. Onyń denesinen 11 oq alynǵan. Qazaqstannyń Syrtqy ister mınıstrligi jerlesimizdiń ólimine qatysty qarsylyq notasyn jibergen bolatyn. 14 qarasha kúni AQSh-qa qaza tapqan Kırılldyń otbasy músheleri, atap aıtqanda anasy Elena Denıakına, ákesi Ivan Denıakın jáne inisi Roman Amerıkaǵa ushyp bardy. Osy is boıynsha sot kelesi jyly ótedi.
Anyqtalǵanyndaı, qaraǵandylyq jigitti atyp óltirgen amerıkandyq polıtsııa qyzmetkeri Stıven D. Renkın agressıvti minez ıesi bolǵan. Onyń ústine polıtsııa qyzmetkeri Facebook áleýmettik jelisindegi óziniń jeke paraqshasyna: «Ana, búgin men keshke baryp, bireýdi atyp ketsem bolady ma?!», - dep jazǵan.
